அவசர உதவிக்கு உலகம் முழுவதும் ஒரே எண்!

எப்பொழுது என்ன நடக்கும் என்று சொல்ல முடியாத உலகில்தான் நாம் இப்பொழுது வாழ்ந்து கொண்டிருக்கிறோம். நாம் நினைத்துப் பார்க்க முடியாத சம்பவங்கள் எங்கு வேண்டுமானாலும் நடந்து விடலாம். அப்பொழுது உதவிக்கு யாரை அழைப்பது என்று பரிதவிப்போம். இதற்காகவே 24 மணி நேரமும் செயல்படக்கூடிய அவசர எண்கள் உள்ளன. காவல்துறை கட்டுப் பாட்டு அறையைத் தொடர்பு கொள்ள 044-2844 7200 என்ற எண்ணை எப்பொழுது வேண்டுமானாலும் தொடர்பு கொள்ளலாம். கம்ப்யூட்டர் மயமாக்கப்பட்ட இந்தச் சேவையில் சம்பந்தப்பட்ட துறைக்கு உடனடியாகத் தகவல் தெரிவிக்கப்பட்டு நடவடிக்கை எடுக்கப்படும். 

 

இதுபோக, ஒவ்வொரு துறைக்கும் இலவச அவசர அழைப்பு எண்கள் உள்ளன. இவை அனைத்தும் 24 மணி நேர சேவை கொண்டவை. அவசர போலீஸ் உதவிக்கு 100, தீயணைப்புத் துறைக்கு 101, போக்குவரத்து முறைகேட்டுக்கு 103, ஆம்புலன்ஸ் உதவிக்கு108, குழந்தைகளுக்கான உதவிகளுக்கு 1098, பெண்களுக்கான உதவிக்கு 1091, முதியோருக்கான உதவிக்கு 1253, மீனவர்கள் மற்றும் கடலோரப் பாதுகாப்பு உதவிக்கு 1093, விலங்குகள் பாதுகாப்பு உதவிக்கு 12700, ராகிங் தொல்லை உதவிக்கு 155222 அல்லது 18001805512 என்று ஒவ்வொன்றுக்கும் ஒரு எண் உள்ளது. இவை அனைத்தையும் நினைவில் வைத்துக் கொள்வது சிரமம். அதிலும் வெளிநாடு சென்றிருக்கும்பொழுது நமது நாட்டுக்கான அவசர உதவி எண்கள் பயன்படாது.

 

இன்றைக்கு வெளிநாட்டுப் பயணம் என்பது சாதாரணமாகிவிட்டது. அங்கு நாம் ஏதேனும் பிரச்னையில் மாட்டிக்கொண்டால், அவசர உதவிக்கு என்ன செய்வது? அதற்காகத்தான் உலகம் முழுக்க பயன்படும்படியான, ஒரு பிரத்யேக அவசர உதவி எண்ணை ஒவ்வொரு நாடும் தங்கள் நாட்டில் இருக்கும் காவல்துறை கட்டுப்பாட்டு அறைக்கோ அல்லது உதவி மையத்துக்கோ சென்றடையும்படி அமைத்திருப்பார்கள்.

 

நமது தமிழகத்தில் 911, 112 எண்களை டயல் செய்தால், அது தானாக அவசர எண் 100க்கு சென்று சேர்வதுபோல் அமைத்துள்ளனர். இந்த எண்ணுக்கு மிஸ்டு கால் கொடுத்தால்கூட போதும். அவர்கள் நம்மை தொடர்புகொண்டு உதவி செய்வார்கள். செல்ஃபோனில் கீபேட் லாக் ஆகியிருந்தாலும்கூட 1,2,9 ஆகிய இந்த மூன்று எண்களை மட்டும் டயல் செய்ய முடியும். உங்கள் மொபைல் சிம் பிளாக் ஆகியிருந்தாலும்கூட இந்த 911, 112 எண்களை அழைக்க முடியும். மொபைல் சிக்னல் இல்லாத இடங்களில்கூட டயல் செய்ய முடியும். எனவே, உலகம் முழுவதும் அவசர உதவிக்கு அழைக்கக்கூடிய 911, 112 எண்களை நாம் நினைவில் வைத்திருப்பது நல்லது.

 

ஜெயசுதா

திருக்குறளின் மேன்மை!

என்னிடம் ஒருவர், ஒரு திருக்குறளைக் கூறுங்கள். அந்தக் குறளைக் கூறும் பொழுது உதடுகள் ஒட்டக் கூடாது. உதடுகள் ஒட்டாமல் கூறக் கூடிய திருக்குறள் எது?" என்று கேட்டார். எனக்குத் தெரியவில்லை. பின் அவரே கூறினார்.

யாதெனின் யாதெனின் நீங்கியான் நோதல்
அதனின் அதனின் இலன்.

துறவு என்னும் அதிகாரத்தில் வரும் இந்தக் குறளின் பொருள் எவற்றையெல்லம் நாம் நீக்கிவிடுகிறோமோ, அவற்றிலிருந்து வரும் துன்பங்களும் நமக்கு இல்லை.

மேலும் ஒரு தகவலைக் கூறினார். உலகப் பற்றுக்களை விட்டுவிட வேண்டுமானால் என்ன செய்ய வேண்டும்? இறைவனிடம் பற்று வைக்கவேண்டும். இறைவன் பற்று அற்றவன் - பற்றுக்களை விட்டவன். அவனிடம் பற்று வைக்க வேண்டும். இந்தக் குறட்பாவைக் கூறும் பொழுது உதடுகள் நன்றாக ஒட்டுகின்றன.

பற்றுக பற்றற்றான் பற்றினை அப்பற்றை

பற்றுக பற்று விடற்கு.

இந்தக் குறளும் ‘துறவு’ என்ற அதிகாரத்தில் இடம் பெற்றுள்ளது.

இவை தற்செயலாக அமைந்ததா அல்லது திருவள்ளுவர் மிகவும் யோசித்து அமைத்தாரா என்றெல்லாம் நம்மை மிகவும் சிந்திக்க வைக்கிறதல்லவா? என்னே அய்யனின் பெருமை!

தமிழ்மணி

ஹெச்டிஎஃப்சி - ஹவுஸிங் டெவலப்மென்ட் ஃபைனான்ஸ் கார்ப்பரேஷன்!

ஹெச்டிஎஃப்சி எனச் சுருக்கமான பெயரில் அனைவருக்கும் அறிமுகமுள்ள இந்த நிறுவனம் 30  வருடங்களுக்கும் மேலாக மத்தியதர மக்களுக்குச் சொந்த வீட்டுக்கனவை நனவாக்கி வருகிறது. அரசுடைமை ஆக்கப்பட்ட வங்கியான பாரத ஸ்டேட் பேங்க்தான் வீட்டுக் கடனில் முதல் இடத்தில் இருக்கிறது. இதற்கடுத்து,  கடன் தொகை அளவில் பெரிய கம்பெனியாக இருப்பது  இதுதான்!  

பிசினஸ் எப்படி? 

கையில் மொத்தமாகப் பணம் வைத்துக்கொண்டு வீடு கட்டுபவர்களை இந்தக் காலத்தில் விரல்விட்டு எண்ணிவிடலாம். அதிலும் வீட்டுக் கடனில் அசலுக்கும் வட்டிக்கும் வருமான வரிச் சலுகை இருப்பதால் அனைவருமே வீட்டுக் கடன் வாங்க முயற்சிப்பார்கள் என்பதுதான் இந்தத் துறைக்கு ஒரு பெரிய வரப்பிரசாதம்.

ஆனால், 5 வருடகாலத்துக்கு டெபாசிட்களை வாடிக்கையாளர் களிடமிருந்து வாங்கி, 15 வருடகாலத்துக்கான வீட்டுக் கடனைத் தந்து நீண்டகாலமாக வெற்றிகரமாகத் தொழில் செய்வது ஒரு சாதாரண விஷயமில்லை. அதிலும் 30 ஆண்டுகளுக்கு மேலாக இந்தத் துறையில் கோலோச்சி இருப்பது விசேஷமான ஒன்று எனலாம்.

ஏனென்றால், வீட்டுக் கடன் வியாபாரத்தின் அளவு என்பது பொருளாதார வளர்ச்சி மற்றும் வீழ்ச்சிக்கு ஏற்றாற்போல் வேகமாக மாறக்கூடிய ஒன்றாகும். நாட்டின் ஒட்டுமொத்த மக்கள் தொகையைக் கணக்கிடும்போது தொடர்ந்து நிலவிவரும் மத்தியதர வர்க்கத்தினருக்கான வீடுகளுக்கான தட்டுப்பாடு, குறைந்த அளவில் புழக்கத்தில் இருக்கும் வீட்டுக் கடன் என்பது அடுத்தப் பொருளாதார வளர்ச்சி சைக்கிள் வர ஆரம்பிக்கும்போது பெரிய அளவுக்கான வியாபாரத்துக்கு அடிகோலும் என்பதில் சந்தேகமில்லை.

இந்திய மக்கள்தொகையில் கிட்டத்தட்ட 60% பேர் 30 வயதுக்குக் கீழ் இருப்பவர்கள். இந்த இளைய சமுதாயத்தினரும் உழைத்துச் சம்பாதிக்கும்போது தங்களுக்கான வீடுகளின் தேவையைப் பூர்த்திச் செய்ய வீட்டுக் கடன் வாங்கவே செய்வார்கள் என்பது உறுதியான வியாபாரத்துக்கான வாய்ப்பையே காட்டுகிறது.

 கம்பெனி எப்படி?

அகில இந்திய அளவில் 300 அலுவலகங்கள், 90 துணைநிலை அலுவலகங்கள் என்ற வலுவான நெட்வொர்க்கை உருவாக்கி 2,400 பெரிய மற்றும் சிறிய நகரங்களில் வீட்டுக் கடன் வழங்கித் தன்னுடைய தொழிலை சிறப்பாகச் செய்துவருகிறது. தவிர, டைரக்ட் சேல்ஸ் ஏஜென்ட்கள் பலரையும் பணியில் இறக்கித் தனது  வியாபாரத்தைப் பெருக்கி வருகிறது.

ஹவுஸிங் ஃபைனான்ஸ் தொழிலில் மட்டுமல்லாமல், ஃபைனான்ஸ் துறையில் ஒரு பெரும் குழுமமாக உருவெடுக்கத் தேவையான முதலீடுகளான ஆயுள் காப்பீடு (ஹெச்டிஎஃப்சி லைஃப்), வங்கி (ஹெச்டிஎஃப்சி), மியூச்சுவல் ஃபண்டு (ஹெச்டிஎஃப்சி அசெட் மேனேஜ்மென்ட்), ஜெனரல் இன்ஷூரன்ஸ் (ஹெச்டிஎஃப்சி ஜெனரல்) என நிதிச் சார்ந்த அனைத்து முக்கியத் துறைகளிலும் கால்பதித்துள்ளது.  

ஃபைனான்ஸ் துறையில் செலவினம் என்பது லாபத்தைப் பாதிக்கக்கூடிய மிக முக்கியமான ஒரு விஷயம். இந்த நிறுவனம் ஹவுஸிங் ஃபைனான்ஸை மிகுந்த கவனத்துடன் செய்துவருவதால் பல ஆண்டுகளாக வருமானத்துக்கும் செலவுக்கும் இடையே இருக்கும் விகிதாசாரத்தைக் ஏறக்குறைய மிகக் குறைந்த அளவான ஏழு சதவிகிதத்திலேயே வைத்துக்கொண்டுள்ளது.

நீண்டகாலமாக இந்தத் துறையில் இருப்பதாலும், சிறந்த விற்பனை பிரதிநிதிகளைப் பெற்றிருப்பதாலும் புதிய வாடிக்கையாளர்களைப் பெறுவது இந்த நிறுவனத்துக்கு மிகவும் சுலபமான விஷயமாக இருக்கிறது.  புதிய வியாபாரத்தில் ஏறக்குறைய 85 சதவிகிதத்தைச் சொந்தமாகவே பெற்றுக்கொள்கிறது.  ஹெச்டிஎஃப்சி பேங்க் மூலமாகவும் வீட்டுக் கடனுக்கான வாடிக்கையாளர்கள் இந்த நிறுவனத்துக்குக் கிடைக்கின்றனர்.  

ஃபைனான்ஸிங் துறைக்கு மிகவும் தேவையான கன்சர்வேட்டிவ் அப்ரோச் என்பது இந்த நிறுவனத்துக்கு  மிக அதிகம். நீண்டநாட்களாகத் தொடர்ந்து கடன் அளித்த சொத்தின் மதிப்புக்கும், கடன் தொகைக்கும் இடையே உள்ள விகிதாசாரம் ஏறக்குறைய 65 சதவிகிதமாக இருப்பதே இதற்குச் சான்று. மிகவும் குறைவான வாராக்கடன் ஒதுக்கீடு விகிதம், மிகவும் குறைவான வாராக்கடன் மூலம் வரும் நஷ்டம் என்பதை நீண்டநாட்களாகக் கொண்டிருப்பது இதன் தனிச் சிறப்பு.

போட்டி எப்படி? 

வாய்ப்புகள் பலவற்றை வழங்கும் இதுபோன்ற தொழில்களில் போட்டியும் அதிகமாக இருக்கவே செய்யும். அதிலும் வங்கிகள் இந்தத் தொழிலில் கால்பதிக்க மிகவும் ஆவலாகச் செயல்பட்டு வருகின்றன. இருப்பினும் தன்னுடைய தரமான சேவையால் மட்டுமே இந்தப் போட்டியை இந்த நிறுவனம் சமாளித்து வருகிறது. போட்டி அதிகமானதால் இந்த நிறுவனம் வழங்கும் பல்வேறு சேவைகளுக்கான கட்டணங்கள் ஒட்டுமொத்தமாகத் தள்ளுபடி செய்யப்படவோ அல்லது குறைக்கப்படவோ வேண்டியுள்ளது.

ரிஸ்க் ஏதும் உண்டா? 

இந்த நிறுவனத்தின் வியாபாரம் ரிசர்வ் வங்கி மற்றும் நேஷனல் ஹவுஸிங் பேங்க் என்ற இரண்டு நிறுவனங்களின் கட்டுப்பாட்டுக்குள் வருகிறது. வீடு மற்றும் மனைகளின் விலை அதிவேகமாக ஏற ஆரம்பித்த நாளிலிருந்தே சட்டதிட்டங்களும் கடுமையாகிக்கொண்டே வருகிறது. ஏனென்றால், கட்டுக்கோப்பில்லாத கடன் வழங்குதல் என்பது வீடு மற்றும் மனை விலைகளில் உச்சகட்ட ஸ்பெக்குலேஷனைக் கொண்டுவந்து இறுதியில் விலைச்சரிவுகள் பெரிய அளவில் வந்துவிட வாய்ப்புள்ளது.

சமீபத்தில் வந்த சட்டமான நிலம் கையகப்படுத்துதல் சட்டம் மற்றும் தற்சமயம் அரசாங்கம் கொண்டுவர முயன்றுகொண்டிருக்கும் ரியல் எஸ்டேட் துறையைக் கண்காணிப்பதற்கான தனி ரெகுலேட்டர் போன்ற பல்வேறு விஷயங்களும் ஹெச்டிஎஃப்சியின் தொழிலில் தற்காலிகமான பாதிப்புகளைக் கொண்டுவர வாய்ப்புள்ளது. ஒருகாலத்தில் மொத்த வருமானத்தில் 30% வரை இருந்த கட்டண வருவாய் தற்சமயம் ஹவுஸிங் துறையில் நிலவிவரும் போட்டியால் கிட்டத்தட்ட இரண்டு சதவிகித அளவுக்குக் குறைந்துவிட்டது.

ஏறக்குறைய 30 ஆண்டுகளுக்கு மேலான தொழில் அனுபவம், நிர்வாகத்தின் கன்சர்வேட்டிவ் அப்ரோச் மற்றும் மக்கள் மனதில் இருக்கும் இந்த நிறுவனம் குறித்த பிராண்டு வேல்யூ - இவற்றை  மனதில்கொண்டு இந்த நிறுவனத்தின் பங்குகளை வீட்டுக் கடனை நீண்டநாட்களுக்கு வாங்குவதுபோல், ஓர் அசாதாரணச் சூழலில் இந்தப் பங்கின் விலை சந்தையில் நன்றாக இறங்கும்போது நீண்டகால முதலீட்டுக்காக வாங்கிப்போடலாம்.

 

வரிச் சேமிக்கும் வழிகள்!

வருமான வரியை எப்படியாவது மிச்சப்படுத்திவிட வேண்டும் என்பதில் அனைவரும் உறுதியாக இருக்கிறார்கள். ஆனால், தேவையான முறையில் வரியை மிச்சப்படுத்தி இருக்கிறோமா என்றால், இல்லை என்பதே பலரது பதிலாக இருக்கும்.

அண்மையில் 35 வயதான நண்பர் ஒருவர் சாலை விபத்தில் திடீரென இறந்துவிட்டார். அவர் வருமான வரியை மிச்சப்படுத்த பல இன்ஷூரன்ஸ் பாலிசிகளை எடுத்துவைத்திருந்தார்; ஆண்டுக்கு சுமார் 12,000 ரூபாய்க்குமேல் பிரீமியம் கட்டி வந்திருக்கிறார். ஆனால், அவரது குடும்பத்துக்கு இழப்பீடாகக் கிடைத்த தொகை வெறும் 4 லட்சம் ரூபாய்க்குள்தான். இவர் எடுத்திருந்தது, முதலீடு மற்றும் காப்பீடு கலந்த எண்டோவ்மென்ட் பாலிசிகள். இதற்குப் பதிலாக, அதே ஆண்டு பிரீமியமான 12,000 ரூபாயைச் செலுத்தி, டேர்ம் இன்ஷூரன்ஸ் பாலிசியை எடுத்திருந்தால், அவரது குடும்பத்துக்கு 1 கோடி ரூபாய் இழப்பீடு கிடைத்திருக்கும்.

அந்தவகையில் வரிச் சேமிப்புக்காகச் செலவு மற்றும் முதலீடு செய்யும்போது கூடுதல் கவனத்துடன் செயல்பட வேண்டும். இல்லையென்றால் வரியைச் சேமிக்கிறேன் பேர்வழி என்று பணத்தைத் தேவையில்லாமல் இழக்கவேண்டியிருக்கும். நாம் செய்யும் செலவிலும், சேமிப்பிலும் வரியைச் சேமிக்கும் வழிகள் பற்றி தெரிந்துகொண்டால், நம்முடைய பணத்தை வீணாக்காமல், எதிர்காலத்தில் நல்ல லாபத்தையும் பார்க்க வாய்ப்பிருக்கிறது.

 

செலவுகள் மூலம் வரிச் சேமிப்பு!

முதலில் எந்தெந்தச் செலவுகளுக்கு வருமான வரிச் சலுகைக் கிடைக்கிறது என்று பார்ப்போம்.

80சி பிரிவின்கீழ் ஆயுள் காப்பீடு பிரீமியம், பிள்ளைகளின் கல்விக் கட்டணம், வீட்டுக் கடன் அசல் போன்றவற்றுக்கு வரிச் சலுகை கிடைக்கிறது.

லைஃப் இன்ஷூரன்ஸ் பிரீமியம்!

லைஃப் இன்ஷூரன்ஸ் பாலிசியைச் செலவு என்று நினைப்பதைவிட, நம்மை நம்பியிருக்கும் குடும்பத்துக்கான கவசம் என்றுதான் கருதவேண்டும். லைஃப் இன்ஷூரன்ஸ் என்கிறபோது, இதில் டேர்ம் இன்ஷூரன்ஸ், பணப் பலன் மற்றும் பங்குச் சந்தை சார்ந்த பாலிசிகள் இருக்கின்றன.

டேர்ம் இன்ஷூரன்ஸ் பாலிசியில் பிரீமியம் மிகக் குறைவாக இருக்கும். இடையில் அசம்பாவிதம் ஏதாவது நடந்தால் மட்டுமே கிளைம் கிடைக்கும். முதிர்வுத் தொகை எதுவும் கிடையாது.

எண்டோவ்மென்ட் மற்றும் யூலிப் பாலிசிகளில் கட்டும் பிரீமியம் மற்றும் முதிர்வு ஆதாயத்துக்கு வரி இல்லை. எண்டோவ்மென்ட் பாலிசியில் பிரீமியத்தின் ஒருபகுதி, இன்ஷூரன்ஸ் கவரேஜுக்கும் எடுத்துக்கொள்ளப்படுவதால் மொத்தத்தில் சுமார் 6% வருமானம் கிடைக்கக்கூடும்.

அண்மையில் ஐஆர்டிஏ அனைத்து ஆயுள் காப்பீட்டு பாலிசிகளிலும் மாற்றங்களைச் செய்திருக்கிறது. குறிப்பாக, இன்ஷூரன்ஸ் கவரேஜை அதிகரித்து, முதலீட்டுக்கான பகுதியைக் குறைத்திருக்கிறது. இருந்தாலும் டேர்ம் பிளான்தான், குறைவான பிரீமியத்தில் அதிக கவரேஜ் அளிப்பதாக இருக்கிறது. பொதுவாக, ஒருவரின் ஆண்டுச் சம்பளத்தைப்போல் 10 முதல் 12 மடங்கு தொகைக்கு லைஃப் இன்ஷூரன்ஸ் பாலிசி எடுத்துக்கொள்வது நல்லது.

பிள்ளைகளின் கல்விக் கட்டணம்..!

பிள்ளைகளின் கல்விச் செலவுகளுக்கு வரிச் சலுகை இருக்கிறது. கல்விக் கட்டணத்துக்கு மட்டும்தான் வரிச் சலுகை. தம்பதிகள் இருவரும் வேலை பார்க்கும்போது, இரண்டு பிள்ளைகள் என்றால் ஒருவருக்குத் தாயும், இன்னொருவருக்குத் தந்தையும் வரிச் சலுகை பெறுவதன்மூலம் அதிக வரியை மிச்சப்படுத்த முடியும்.

                                             ஹெல்த் இன்ஷூரன்ஸ் பிரீமியம் (80டி).

அடுத்த முக்கியமான செலவு, ஹெல்த் இன்ஷூரன்ஸ். இதற்கான பிரீமியத்துக்கு வரிச் சலுகை இருக்கிறது. ஒரு நிதி ஆண்டில் வரிதாரர் மற்றும் அவரின் குடும்பத்துக்குக் கட்டும் ஹெல்த் இன்ஷூரன்ஸ் பிரீமியத்தில் 15,000 ரூபாய்க்கு வரிச் சலுகை உண்டு. மூத்த குடிமக்களாக இருந்தால் 20,000 ரூபாய் வரையிலான பிரீமியத்துக்கு வரிச் சலுகை இருக்கிறது. வரிதாரர் தனது பெற்றோருக்கு எடுக்கும் மெடிக்ளைம் பாலிசி பிரீமியத்துக்கு அதிகப்படியாக ரூ.20,000 வரை வரிச் சலுகை பெற முடியும்.

மருத்துவச் செலவு நாளுக்குநாள் அதிகரித்து வருகிறது. மேலும், கிராமங்களைவிட நகரங்களில் செலவு அதிகமாக இருக்கிறது. இவற்றை மனதில்வைத்து கணவன், மனைவி, இரண்டு குழந்தைகள் குடும்பத்துக்கு 3 முதல் 5 லட்சம் ரூபாய்க்கு கவரேஜ் அளிக்கும் பாலிசியை எடுத்துக்கொள்வது அவசியம். இதற்கு ஆண்டு பிரீமியம் தோராயமாக 5,000 ரூபாய்க்குமேல் இருக்கும்.

ஏதாவது நோய் பாதிப்பு இருக்கிறதா என்பதைக் கண்டறிய உதவும் மாஸ்டர் ஹெல்த் செக்-அப் செய்யும் செலவுகளுக்கு ஆண்டுக்கு அதிகபட்சம் ரூ.5000 வரிச் சலுகை கிடைக்கும். இது தற்போது அளிக்கப்பட்டுவரும் 15,000 ரூபாய் பிரீமியத் தொகைக்கான வரிச் சலுகைக்குள் அடங்கும்.

வீட்டுக் கடன் அசல்!

சொந்த வீடு ஒருவருக்கு அவசியம் என்பதால், அதை வாங்கும் கடனில் திரும்பச் செலுத்தும் தொகைக்கு வரிச் சலுகை உண்டு. வீட்டுக் கடனை திரும்பக் கட்டுவது ஒரு செலவாக இருந்தாலும், அது நீண்டகாலத்தில் செல்வம் சேர்க்க ஒருவருக்கு உதவுவதாக உள்ளது.

வீட்டுக் கடனுக்கான வட்டி  24பி!

வீட்டுக் கடனை திரும்பச் செலுத்துவதில், வட்டியையும் ஒரு செலவாக எடுத்துக்கொண்டால், அந்த வீட்டில் குடியிருக்கும்பட்சத்தில் ஒரு நிதி ஆண்டில் ரூ.1.5 லட்சம்வரை வரிச் சலுகை உண்டு. அதுவே, அந்த வீட்டை வாடகைக்கு விட்டு, வாடகையை வருமானமாகக் காட்டியிருந்தால் செலுத்தும் முழு வட்டிக்கும் வரிச் சலுகை உண்டு. இதில், வருமான வரியை அதிகமாக மிச்சப்படுத்த, கணவன், மனைவி இருவரும் வேலை பார்க்கும்பட்சத்தில் கூட்டாகக் கடன் வாங்கலாம். அப்போது இருவரும் தனித்தனியே அசல் தொகைக்கு 80சி பிரிவிலும் மற்றும் வட்டிக்கு ரூ.1.5 லட்சம் ரூபாய் வரிச் சலுகை பெற முடியும்.

வீட்டு வாடகை படி 10 (13ஏ)!

குடியிருக்கும் வீட்டுக்குத் தரப்படும் வாடகைக்கு வரிவிலக்குச் சலுகை உண்டு. (வீட்டு வாடகைப் படி கணக்கீட்டு முறையை விரிவாகத் தெரிந்துகொள்ள: http://nanayam.vikatan.com/index.php?aid=4911) இதற்கு மொத்தச் சம்பளத்தில் 10%-க்குமேல் வாடகையாகத் தந்திருக்கவேண்டும். மேலும், குடியிருக்கும் நகரம், பணியாளர் பெறும் வீட்டு வாடகைப் படி ஆகியவற்றைப் பொறுத்துக் கழிவு இருக்கிறது.  வாடகை ஆண்டுக்கு ரூ.1 லட்சம் மேல் சென்றால், உரிமையாளரின் பான் நம்பரை, ரசீதில் குறிப்பிடுவது அவசியம்.

சிறப்புச் சலுகை!

வங்கி அல்லது வீட்டு வசதி நிதி நிறுவனத்தில் கடன் பெற்று முதல் முறையாக வீடு வாங்கு வோருக்குக் கூடுதலாக ரூ.1 லட்சம் வரிச் சலுகை அளிக்கப்படுகிறது. இந்த வீட்டை 2013 ஏப்ரல் 1-ம் தேதியில் இருந்து 2014 மார்ச் 31-ம் தேதிக்குள் வாங்கியிருக்க வேண்டும். மேலும், வீட்டுக் கடன் ரூ.25 லட்சத்துக்குள்ளும், வீட்டின் விலை ரூ.40 லட்சத்துக்குள்ளும் இருக்கவேண்டும். அவர் செலுத்தும் வட்டிக்கு ரூ.1 லட்சம்வரை கூடுதலாக வரிக் கழிவைப் பெறலாம். மேலே கூறப்பட்ட காலகட்டத்தில் வரிச் சலுகையை முழுமையாகப் பெற முடியாமல்போனால், மீதி வரிச் சலுகையை 2015-2016ம் ஆண்டில் பெற்றுக்கொள்ள முடியும். ஏற்கெனவே அளிக்கப்பட்டுவரும் ரூ.1.5 லட்சம் வட்டிக் கழிவுடன் கூடுதலாக இந்த ரூ.1 லட்சம் கழிவு அளிக்கப்படுகிறது.

கல்விக் கடன் 80இ!

வரிக் கட்டுபவர் தன் உயர்கல்விக்காக வாங்கும் கடனுக்கான வட்டிக்கு வரிச் சலுகை இருக்கிறது. கடனைக் கட்டத் தொடங்கி, 8 ஆண்டுகளுக்கு மட்டுமே இந்த வரிச் சலுகைக் கிடைக்கும். அசலுக்கு வரிச் சலுகை இல்லை.

உடல் ஊனமுற்ற வரிதாரர் 80யூ!

வரிக் கட்டுபவர் ஊனமுற்றவராக இருந்தால், ரூ.50,000 (தீவிரமான உடல் ஊனம் ரூ. 1,00,000 ரூபாய்) வரிச் சலுகை இருக்கிறது.

மருத்துவச் சிகிச்சைக்கான செலவு 80 டி.டி!

வரிக் கட்டுபவரைச் சார்ந்திருக்கும் செயல்பட முடியாத அளவுக்கு ஊனமுற்றவர்களுக்கான மருத்துவச் செலவில் ரூ.50,000 (தீவிர பாதிப்புக்கு ரூ.1,00,000) வரை வருமான வரிவிலக்கு இருக்கிறது.

தீவிர நோய்களுக்கான சிகிச்சை   80 டி.டி.பி!

புற்றுநோய், எய்ட்ஸ், நரம்பு மண்டல பிரச்னை உள்ளிட்ட தீவிர நோய்களுக்குச் செய்யப்படும் மருத்துவச் செலவில் அதிகபட்சம் ரூ.40,000 (மூத்த குடிமக்களுக்கு ரூ.60,000) வரிவிலக்கு உள்ளது.

நன்கொடை 80ஜி!

நீங்கள் அளிக்கும் நன்கொடைகளுக்கு நிபந்தனைகளுக்கு உட்பட்டு 50% முதல் 100% வரை வரிச் சலுகை இருக்கிறது.

இதுவரை சொன்னவற்றுள் அவசியமானவற்றைப் பயன்படுத்திக்கொள்ள முடியும் என்பதில்தான் நீங்கள் வருமான வரியை மிச்சப்படுத்துவது இருக்கிறது.

முதலீட்டின் மூலம் வரிச் சேமிப்பு!

அடுத்து, முதலீட்டின் மூலம் கிடைக்கும் வரிச் சேமிப்பு பற்றி பார்ப்போம்.

முதலீடு மூலம் வருமான வரியை மிச்சப்படுத்தும் பல வழிகள் 80சி பிரிவின்கீழ் வருகின்றன. இபிஎஃப், பிபிஎஃப், ஃபிக்ஸட் டெபாசிட், தேசிய சேமிப்புப் பத்திரம், தபால் அலுவலகச் சேமிப்புத் திட்டங்கள், இஎல்எஸ்எஸ் மியூச்சுவல் ஃபண்டு போன்றவை இவற்றில் முக்கிய முதலீடுகளாக உள்ளன.

எம்ப்ளாயி பிராவிடன்ட் ஃபண்டு (இபிஎஃப்)!

தனியார் நிறுவனங் களில் பணியாளரின் அடிப்படைச் சம்பளம் மற்றும் பஞ்சப்படியில் 12% சம்பளத்தில் பிஎஃப்-ஆகப் பிடிக்கப்படுகிறது. இந்தத் தொகை மற்றும் அதன்மூலமான வட்டி வருமானத்துக்கு வரி இல்லை. தற்போதைய நிலையில் 8.75% வட்டி ஆண்டுக்குக் கிடைக்கிறது. ஏறக்குறைய வங்கி எஃப்டி அளவுக்கு வட்டிக் கிடைப்பதால், விருப்பத் திட்டத்தின் (விபிஎஃப்) கீழ் கூடுதலாக 12% முதலீட்டையும் இந்தக் கணக்கிலே மேற்கொள்வது நல்லது.

இது முற்றிலும் பாதுகாப்பான முதலீடு. ரிஸ்க் எடுக்க விரும்பாதவர் களுக்கு ஏற்றது. இதில் எந்த அளவுக்கு அதிகம் சேர்க்க முடியுமோ, அந்த அளவுக்குச் சேர்க்கலாம்.

பப்ளிக் பிராவிடன்ட் ஃபண்டு (பிபிஎஃப்)!

சம்பளத்தில் பிஎஃப் பிடிக்கப்படாத பணியாளர்கள், சுய தொழில் செய்பவர்கள் என யார் வேண்டு மானாலும் இந்தத் திட்டத்தில் முதலீடு செய்து வரிச் சலுகைப் பெறலாம். ஆண்டுக்குக் குறைந்தது ரூ.500கூட முதலீடு செய்யலாம்.  ஓராண்டில் அதிகபட்சம் ரூ.1,00,000 வரையிலான முதலீட்டுக்கு வரிச் சலுகை கிடைக்கும். இதுவும் இபிஎஃப்போல், முழுக்கப் பாதுகாப்பான முதலீடு. முதலீட்டுக் காலம் 15 ஆண்டுகள்;  வட்டிக்கு வரி இல்லை.  ஆண்டுக்கு வட்டி 8.7% கிடைக்கும்.

வங்கி 5 ஆண்டு ஃபிக்ஸட் டெபாசிட்!

அடுத்து, வங்கி ஐந்தாண்டு ஃபிக்ஸட் டெபாசிட் இருக்கிறது. இதில் முதலீட்டுத் தொகைக்கு வரிச் சலுகை இருக்கிறது. குறைந்தபட்ச முதலீடு ரூ1,000. வட்டி 8.5 முதல் 9%. மூத்த குடிமக்களுக்கு 0.25 முதல் 0.5% கூடுதல் வட்டி உண்டு. இதில் வருமானத்துக்கு வரிக் கட்டவேண்டும் என்பது பாதக அம்சம். மூத்த குடிமக்கள் மற்றும் குறைந்த வருவாய்ப் பிரிவினர், ரிஸ்க் எடுக்க விரும்பாதவர்கள் இந்த முதலீட்டுக்கு ஆதரவு அளிக்கலாம்.

தேசிய சேமிப்புப் பத்திரம்!

மத்திய அரசின் தேசிய சேமிப்புப் பத்திரத்தில் (என்எஸ்சி) செய்யப்படும் முதலீட்டுக்கு வரிச் சலுகை இருக்கிறது. வட்டி ஆண்டுக்கு 8.5% வழங்கப்படுகிறது. இது ஆறு ஆண்டுத் திட்டம். இது பாதுகாப்பான முதலீடு என்றாலும் வட்டிக்கு வரி உள்ளது. ரிஸ்க் எடுக்க விரும்பாதவர்களுக்கும், குறைந்த வருவாய்ப் பிரிவினருக்கும் ஏற்றது இந்தத் திட்டம்.

தபால் அலுவலகச் சேமிப்புத் திட்டங்கள்!

மூத்த குடிமக்கள் சேமிப்புத் திட்டம், (9.2%, 5 ஆண்டுத் திட்டம்), தபால் அலுவலக டைம் டெபாசிட் (8.5%, 5 ஆண்டு) போன்றவற்றுக்கும் வரிச் சலுகை உண்டு.

இஎல்எஸ்எஸ்!

மூன்றாண்டுகால லாக் இன் பீரியடு கொண்ட பங்குச் சந்தை சார்ந்த மியூச்சுவல் ஃபண்டு முதலீட்டுக்கு வரிவிலக்கு இருக்கிறது. மாதந்தோறும் குறைந்தது 500 ரூபாய்கூட இதில் முதலீடு செய்யலாம். இதில் வருமானமானது பங்குச் சந்தையின் செயல்பாட்டைப் பொறுத்துள்ளது. டிவிடெண்ட் மற்றும் வருமானத்துக்கு வரி இல்லை. ரிஸ்க் எடுக்கத் தயாராக இருப்பவர்களுக்கு ஏற்றது இந்தத் திட்டம்.

ஓய்வூதியத் திட்டங்கள்!

ஆயுள் காப்பீடு நிறுவனங்கள் (80 சிசிசி) மற்றும் மியூச்சுவல் ஃபண்டு நிறுவனங்கள் (80 சிசிடி) கொண்டுள்ள பென்ஷன் திட்டங்களின் முதலீட்டுக்கும் வரிச் சலுகை இருக்கிறது. மத்திய அரசின் புதிய நேஷனல் பென்ஷன் ஸ்கீமில் (80 சிசிஇ) செய்யப்படும் முதலீட்டுக்கு இந்த வரிச் சலுகை இருக்கிறது. பென்ஷன் தொகைக்கு வரி உண்டு என்பது பாதகமான அம்சம். இந்த பென்ஷன் திட்டங்கள் அனைத்திலுமான மொத்த முதலீடு, 80 சி பிரிவின்கீழ் கொண்டுவரப்பட்டு, நிபந்தனைக்கு உட்பட்டு அதிகபட்சம் ரூ.1 லட்சம் வரையில் வரிச் சலுகை அளிக்கப்படும்.

பிஎஃப் திட்டத்தில் சேரும் வசதி இல்லாத சுயதொழில் செய்பவர்கள் மற்றும் கூடுதல் பென்ஷன் தேவை என்று திட்ட மிடுபவர்கள் இதில் முதலீடு செய்யலாம்.

ராஜீவ் காந்தி ஈக்விட்டி சேமிப்புத் திட்டம் 80சிசிஜி!

பங்குச் சந்தையில் புதிய முதலீட்டை ஊக்குவிக்க இந்தத் திட்டம் கொண்டுவரப்பட்டுள்ளது. ராஜீவ் காந்தி பங்குச் சார்ந்த சேமிப்புத் திட்டத்தில் (பங்குகள் மற்றும் மியூச்சுவல் ஃபண்டு) முதன்முறையாக முதலீடு செய்பவர்களுக்கு அதிகபட்சமாக ரூ.50,000 வரையில் (50% சலுகை) வரிச் சலுகை அளிக்கப்படுகிறது. அதாவது, முதலீடு செய்யும் தொகையில் 50 சதவிகிதத்தை ஆண்டு வருமானத்திலிருந்து கழித்துக் கொள்ளலாம். வரிச் சலுகை பெற ஆண்டு வருமானம் 12 லட்சம் ரூபாய்க்கு குறைவாக இருக்கவேண்டும். பங்குகளில் முதல்முறையாக முதலீடு செய்பவராக இருக்கவேண்டும். இந்தத் திட்டத்துக்கான லாக் இன் பீரியடு மூன்று ஆண்டுகள். ரிஸ்க் எடுக்கத் தயாராக இருப்பவர்களுக்கு மட்டும் ஏற்றது. 

எதற்கு முன்னுரிமை?

வருமான வரிச் சேமிப்புக்கான முதலீடு என்கிறபோது முதலில் சம்பளத்தில் பிடிக்கப்படும் பிஎஃப்-க்கு முன்னுரிமை அளிக்கவேண்டும். அதன்பிறகு லைஃப் இன்ஷூரன்ஸ் மற்றும் ஹெல்த் இன்ஷூரன்ஸ் பாலிசிகளுக்கு முக்கியத்துவம் தர வேண்டும். அடுத்து, பிள்ளைகளின் கல்விச் செலவை கணக்கில்கொள்ள வேண்டும். வீட்டுக் கடன் வாங்கியிருந்தால், அதற்கான அசல் மற்றும் வட்டிக்கு வரிச் சலுகையைக் கணக்கில் எடுத்துக்கொள்ள வேண்டும். இதையும் தாண்டி வரிக் கட்டவேண்டியிருந்தால் மட்டுமே இதர முதலீட்டு வாய்ப்புகளைக் கவனிக்க வேண்டும்.

சரவணன் 

உலக புற்றுநோய் விழிப்பு உணர்வு தினம் பிப்ரவரி 4

''சினிமா தியேட்டரில், 'என் பெயர் முகேஷ்... எனக்கு வாய்ப் புற்றுநோய்’ என்று ஆரம்பித்து, அவருக்கு வயது 24, முகேஷ் தற்போது உயிருடன் இல்லை, என்று முடியும் விளம்பரத்தைப் பார்க்கும்போது அதிர்ச்சியாக இருக்கும். இந்தியாவின் ஏதோ ஒரு மூலையில் இருக்கிற முகேஷ் போன்றோர்க்குத்தான் இதுபோன்ற வியாதிகள் வரும். நம் ஊரில் எல்லாம் இந்த அளவுக்குப் பிரச்னை இல்லை என்று பலரும் அந்த விளம்பரத்தைப் பெரிதாக எடுத்துக்கொள்வது இல்லை. ஆனால், தமிழகத்திலும் வாய்ப் புற்றுநோய் அதிகமாக இருக்கிறது என்பதுதான் அதிர்ச்சி.

'உலக அளவில் உயிரிழப்பை ஏற்படுத்தும் புற்றுநோயாக முதல் இடத்தில் மார்பகப் புற்றுநோய் இருக்கிறது. புகையிலைப் பொருட்களால் ஏற்படக்கூடிய புற்றுநோய், ஆண்களுக்கு உயிரிழப்பை ஏற்படுத்துவதாக உள்ளது. புகைபிடிப்பது, பான் மசாலா, புகையிலை மெல்லுவது போன்ற செயல்களால், 10-ல் நான்கு பேருக்கு வாய்ப் புற்றுநோய் ஏற்படுகிறது. இந்தப் புற்றுநோயால் 42 சதவிகித ஆண்களும், 18 சதவிகிதப் பெண்களும் உயிரிழக்கின்றனர்.புகையிலைப் பொருட்களைப் பயன்படுத்துபவர்களுக்கு, வாயின் உள்பகுதியில் புண் போல ஆரம்பிக்கும். அது கொஞ்சம் கொஞ்சமாக உதடு, கன்னம், தொண்டை, உணவுக் குழாய் என மற்ற எல்லாப் பகுதிகளையும் தாக்கி, மிக மோசமான வாய்ப் புற்றுநோயாக உருவெடுத்துவிடுகிறது.புற்று நோய் என்பது எப்போதும் வரலாம். புகைக்கும் அளவையும், பான் போடும் அளவையும், நம்முடைய நோய் எதிர்ப்பு ஆற்றலையும் பொருத்துதான் நோய் வருவதற்கான வாய்ப்பு அமையும்.

வாய்ப் புற்றுநோயைத் தடுப்பதற்கான வழி :

தினமும் இரண்டு முறை பல் துலக்க வேண்டும். பற்களுக்கு இடையே உள்ள அழுக்கை அகற்ற ஃபிளாஸ் பயன்படுத்த வேண்டும்.

புகையிலை மெல்லுவதை, புகைப்பதை உடனடியாக நிறுத்த வேண்டும். வாயில் சிறிய புண் ஏற்பட்டாலும் உடனடியாக மருத்துவரின் ஆலோசனை பெற வேண்டும்.

 

மஞ்சள், அடர் பச்சை நிறக் காய்கறிகள், கீரை, பூண்டு, திராட்சை, க்ரீன் டீ, சோயா, தக்காளி போன்ற உணவுகளைச் சாப்பிடுவது புற்றுநோய்க்கான வாய்ப்பைக் குறைக்கும்.

ஆறு மாதங்களுக்கு ஒரு முறை பல் மருத்துவரைச் சந்தித்து வாய் ஆரோக்கியத்தை உறுதிப்படுத்திக்கொள்ள வேண்டும்.

மாதத்துக்கு ஒரு முறை கையடக்கக் கண்ணாடியைவைத்துக்கொண்டு, வீக்கம், புண் போன்று ஏதேனும் உள்ளதா என்று பார்த்து, சந்தேகப்படும்படி இருந்தால், உடனடியாக உங்கள் பல் மருத்துவரிடம் ஆலோசனை பெறுவது நல்லது.

சரவணக்குமார்

மொபைல் இன்ஷூரன்ஸ்

இன்றைய மாடர்ன் உலகில் ஸ்மார்ட்போன் வாங்க வேண்டும் என்கிற ஆசை பலருக்கும் வந்துவிட்டது.  மாதம் பத்தாயிரம் ரூபாய் சம்பளம் வாங்குபவர்கள்கூட இஎம்ஐ-யில் 20 ஆயிரம் ரூபாய்க்கு போன் வாங்குகிறார்கள். இப்படி அதிக விலை தந்து வாங்கும் போன் தொலைந்துபோனாலோ அல்லது சேதம் அடைந்தாலோ அதனால் நமக்கு ஏற்படும் பாதிப்புகள் நிறைய. இந்தப் பாதிப்பிலிருந்து தப்பிக்க இன்ஷூரன்ஸ் நமக்குக் கைதரும் என்றாலும், எந்தச் சூழ்நிலையில் நமக்கு கிளைம் கிடைக்கும், செல்போன் இன்ஷூரன்ஸ் பிரீமியம் எவ்வளவு, கிளைம் செய்யத் தேவைப்படும் ஆவணங்கள் என்னென்ன என்பது பற்றி பார்போம்.

புதிதாக வாங்கும் செல்போன்களுக்கு இன்ஷூரன்ஸ் எடுக்கலாம். ஒரு செல்போனுக்கு அதிகபட்சம் மூன்று வருடங்கள் வரை இன்ஷூரன்ஸ் கிடைக்கும். அதற்குமேல் இன்ஷூரன்ஸை புதுப்பிக்கும்போது இன்ஷூரன்ஸ் கிடைப்பதில் சிக்கல் வரும்.செல்போனின் மதிப்பில் 2-லிருந்து 3 சதவிகிதம்தான் பிரீமியம் இருக்கும். ஆனால், இன்ஷூரன்ஸ் எடுக்கும்போது சில விஷயங்களை பாலிசிதாரர்கள் கட்டாயம் கவனிக்கவேண்டும்.செல்போனுக்கு இன்ஷூரன்ஸ் எடுக்கும்போது பாலிசியின் நிபந்தனைகளைத் தெளிவாகப் படித்துப் பார்ப்பது அவசியம். ஏனெனில், இந்த இன்ஷூரன்ஸில் நிபந்தனைகள் நிறுவனத்துக்கு நிறுவனம் மாறுபடும். சில நிறுவனங்களில் செல்போன் தண்ணீரில் விழுந்தால் கிளைம் தரமாட்டோம் என்ற நிபந்தனை இருக்கும். இன்ஷூரன்ஸ் எடுத்த ஒரு வருடத்தில் செல்போன் தொலைந்து போனால் இத்தனை சதவிகிதம்தான் கிளைம் கிடைக்கும் என்றும் நிபந்தனை விதித்திருப்பார்கள்.மேலும், செல்போன் தொலைந்து விட்டது அல்லது திருடு போய்விட்டது என்ற காரணங்களுக்காக கிளைம் கேட்டு விண்ணப்பிக்கும்போது காவல் துறையில் முதல் தகவல் அறிக்கை கட்டாயம் தேவை.  சில இன்ஷூரன்ஸ் நிறுவனங்களில் செல்போன் காணாமல்போன சம்பவத்தைக் காவல் துறை முதல் தகவல் அறிக்கையாகப் பதிவு செய்யவில்லை என்றாலும், காவல் துறையின் சமுதாயப் பதிவேட்டு ரசீது இருந்தால் போதும் எனக் கூறுகின்றன. எனவே, இன்ஷூரன்ஸ் எடுப்பதற்கு முன்பே எதற்கெல்லாம் கிளைம் கிடைக்கும், எதற்குக் கிடைக்காது என்பதை பாலிசியைப் படித்துப் பார்த்து தெரிந்துகொள்வது நல்லது.

 

பெரும்பாலான இன்ஷூரன்ஸ் நிறுவனங்கள் செல்போன் இன்ஷூரன்ஸ் வழங்குவதையே தவிர்த்து வருகின்றன. ஏனெனில், இன்றைய சூழ்நிலையில் வருடத்துக்கு ஒருமுறை புது செல்போன் வாங்கும் பழக்கத்தைப் பலரும் வைத்துள்ளனர். எனவே, வேண்டுமென்றே போனை தொலைத்திருக்கலாம் என இன்ஷூரன்ஸ் நிறுவனம் சந்தேகப்படுவதுதான் இதற்கு காரணம்.

 

மேலும், செல்போன் தொலைந்து போனால், காவல்துறையில் முதல் தகவல் அறிக்கை பதிவு செய்வதும் கடினமான காரியம். அதேபோல, முதல் வருடத்தில் இன்ஷூரன்ஸ் எடுத்திருந்தாலும் அதில் அதிகபட்சம் மூன்று வருடம் வரை மட்டுமே அந்த இன்ஷூரன்ஸைத் தொடர முடியும்.

இதையெல்லாம் கவனத்தில் கொண்டு, உங்கள் செல்போனுக்கு இன்ஷூரன்ஸ் எடுப்பது அவசியமா என்பதை நீங்களே முடிவு செய்து கொள்ளலாம்.

ரூபாவதி

ஏவிஜி ஆன்டிவைரஸ் செக்யூரிட்டி & கிளீன் மாஸ்டர்! - ஸ்மார்ட் போன்

ஸ்மார்ட் போன் மற்றும் ஸ்மார்ட்போனுக்குள் இருக்கும் புகைப்படங்கள், மொபைல் எண்கள் போன்ற அனைத்து விஷயங்களுக்கும் பங்கம் விளைவிக்கக்கூடிய வைரஸ்களிலிருந்து பாதுகாக்க சில  அப்ளிகேஷன்ஸ் உள்ளன. இவற்றில் தன் வேலையை மிகத் துரிதமாகச் செய்யக்கூடியதுதான் இந்த ஏவிஜி ஆன்டிவைரஸ் செக்யூரிட்டி என்னும் ஆப்ஸ்.

ஒரு ஆப்ஸ் அல்லது ஃபைலை பதிவிறக்கம் செய்து, அதை ஸ்மார்ட்போனுக்குள் உள்ளே நுழைக்கும்போதும், அது பாதுகாப்பானதுதானா என்பதைப் பரிசோதித்துவிட்டுதான் உள்ளே நுழைக்க இது உதவுகிறது. ஸ்மார்ட்போனில் இணையத்தைப் பயன்படுத்தித் தகவல்களைத் தேடும்போதோ அல்லது வீடியோக்களைப் பார்க்கும்போதோகூட ஸ்மார்ட்போன் வைரஸ்களால் பாதிக்கப்படலாம். அந்தச் சமயத்தில்,  நம் ஸ்மார்ட்போனில் இந்த ஆன்டிவைரஸ்  இருந்தால் போனுக்கு எந்தப் பாதிப்பும் வராது.  

ஹைலைட்: இந்த ஆப்ஸை உலகம் முழுக்க 10 கோடிபேர் பதிவிறக்கம் செய்து பயன்படுத்துகின்றனர்.  

கிளீன் மாஸ்டர்

இந்த ஆப்ஸ், ஸ்மார்ட்போன்களில் இருக்கும் தேவையில்லாத ஜங்க் ஃபைல்களைச் சுத்தம் செய்யப் பயன்படுகிறது. தேவையில்லாத ஃபைல்களை நீக்குவதன் மூலம் மெம்மரி பூஸ்டராகவும் செயல்படுகிறது.

பொதுவாக, அதிகமான ஃபைல்கள் ஸ்மார்ட்போன்களில் நிறைந்திருந்தாலே ஸ்மார்ட்போன்களின் வேகம் குறையும். வேகம் குறைவதைத் தடுக்க இதை பயன்படுத்தி மெமரியை அதிகப்படுத்திக் கொள்ளலாம். அதேசமயம், பாதுகாத்து வைத்திருக்கும் ஃபைல்களுக்கு எந்தவொரு பாதிப்பும் இந்த ஆப்ஸினால் உண்டாகாது.

ஹைலைட்:

இந்த ஆப்ஸை உலகம் முழுக்க 5 கோடி பேர் பதிவிறக்கம் செய்து பயன்படுத்தி வருகின்றனர். 30 மொழிகளில் இந்த ஆப்ஸ் சப்போர்ட் செய்கிறது.

 

பால் ஏர்டிஷ் -- 20-ம் நூற்றாண்டின் தலைசிறந்த கணித மேதை

20-ம் நூற்றாண்டின் தலைசிறந்த கணித மேதையாகத் திகழ்ந்தவர், பால் ஏர்டிஷ் Paul Erdős).ஹங்கேரி நாட்டில் பிறந்த இவர், சிறு வயதிலேயே தனது சிறப்பான கணித ஆற்றலை வெளிப்படுத்தினார். தனது மூன்றாவது வயதிலேயே, ஒரு நபரின் வயதைவைத்து, அவர் பிறந்து எத்தனை வினாடிகள் ஆகியிருக்கின்றன என்பதை உடனடியாகக் கணக்கிட்டுக் கூறி, திகைக்கவைப்பார்.

 

21 வயதில் முனைவர் பட்டம் பெற்ற ஏர்டிஷ்,  கணித உண்மைகளை எளிய முறையில் வழங்குவதில் திறமைபெற்றவர். வாழ்நாளில், தனக்கென எதையும் சேர்த்து வைக்காதவர். திருமணம் செய்துகொள்ளவில்லை. இவர் பெயரில் வங்கிக் கணக்குகூட இல்லை. கணித ஆய்வுக்காகவும் வளர்ச்சிக்காகவுமே பாடுபட்டார்.

இன்று வரை மிக அதிக அளவில் கணித ஆய்வுக் கட்டுரைகளை ஏற்படுத்திய கணிதவியலாளர்களில் ஏர்டிஷ் முதல் இடம் வகிக்கிறார். மற்ற கணிதவியலாளர்களின் துணையுடன் 1,500 கணிதக் கட்டுரைகளுக்கு மேல் வழங்கியுள்ளார். மற்றவர்களுடன் சேர்ந்து கணிதம் பயில்வதைத் தன் வாழ்நாள் முழுதும் கடைப்பிடித்தார். திறமை வாய்ந்த கணித வல்லுநர்களைச் சரியாக அடையாளம் கண்டு, அவர்களின் முன்னேற்றத்துக்கு உதவினார். மேலும், தனக்கு விடை காண இயலாத கணிதப் புதிர்களை உருவாக்கு பவர்களுக்கு, சிறு சிறு பரிசுத் தொகைகள் வழங்குவார். கணிதப் படைப்புகளுக்காக, Wolf Prize, Cole Prize என்ற இரு முக்கியக் கணித விருதுகளைப்  பெற்றுள்ளார்.

இவரது கணித ஆற்றலையும் புகழையும் பறைசாற்ற, 'ஏர்டிஷ் எண்’ என்ற கருத்து உருவாக்கப்பட்டது. இதன்படி, ஏர்டிஷின் எண் பூஜ்ஜியம். இவருடன் நேரடியாகக் கணித ஆய்வுக் கட்டுரையை உருவாக்கிய கணிதவியலாளரின் ஏர்டிஷ் எண், ஒன்று. அந்த நபருடன் மற்றொருவர் கணித ஆய்வுக் கட்டுரையைச் சமர்ப்பித்திருந்தால், அவருக்கு ஏர்டிஷ் எண் இரண்டு. இப்படி சங்கிலித் தொடராக அந்த எண், ஏழு வரை இருக்கும். எனவே, ஒருவரது கணிதப் புலமைக்கு அடையாளமாக 'ஏர்டிஷ் எண்’ விளங்குகிறது.

1996 செப்டம்பர் 20-ல், போலந்து நாட்டின் வார்சா நகரில் நடந்த கணிதக் கருத்தரங்கு வளாகத்திலேயே இருதய நோயால் பாதிக்கப்பட்டு, உயிர் நீத்தார். இவரது கணித ஆய்வும் அனைவரிடமும் அன்பு செலுத்தும் பண்பும் என்றும் பேசப்படும். ஏர்டிஷ் வாழ்க்கைச் செய்திகளை மேலும் தெரிந்துகொள்ள The man who loved only numbers’ என்ற புத்தகத்தைப் படிக்கலாம்.

சிவராமன் 

 

ஆழ்கடல் அதிசயங்கள்!

 

1960. ஜனவரி 23. அன்றைய தினம்தான் ஆழ்கடல் ஆராய்ச்சியாளர் ஜாக்கஸ் பிக்கார்ட், அமெரிக்கக் கடற்படை அதிகாரி டான் வால்ஷ் ஆகிய இருவரும் உலக சாதனை ஒன்றை நிகழ்த்தினர். இந்த இருவரும் உலகின் கடல்களிலேயே மிக ஆழமான இடத்துக்குச் சென்று திரும்பினர். பசிபிக் கடலில் மரியானா டிரெஞ்ச் என்னும் பெரிய அகழி உள்ளது. அந்த அகழியில் சேலஞ்சர் மடு எனப்படும் இடத்தின் ஆழம் 10,994 மீட்டர். அதாவது சுமார் 11 கிலோ மீட்டர்.பிக்கார்ட், வால்ஷ் இருவரும் டிரியெஸ்டி எனப்படும் ஆழ் மூழ்கு கலம் ஒன்றின் அடியில் பொருத்தப்பட்ட ஓர் இரும்புக் கோளத்துக்குள் உட்கார்ந்தபடி சேலஞ்சர் மடுவுக்குள் இறங்கினர். உள்ளிருந்தபடி சிறிய ஜன்னல் வழியே உற்றுப் பார்த்தனர். கடலில் அவ்வளவு ஆழத்தில் சுற்றிலும் கும்மிருட்டு. கோளத்துடன் இணைந்த மின்விளக்கு வெளிச்சத்தில் சிறு மீன்கள் அங்குமிங்கும் செல்வது தெரிந்தது.அவர்களால் அந்தக் கோளத்திலிருந்து வெளியே வந்திருக்க முடியாது. அதற்கான வழியும் கிடையாது. அப்படி வெளியே வர முடிந்திருந்தால் நொடியில் டூத் பேஸ்ட் டியூப் போல பசக் என்று நசுங்கி மடிந்திருப்பர்.அவர்கள் இருவரும் ஒண்டிக் கொண்டிருந்த கோளத்தைச் சுற்றிலுமுள்ள கடல் நீரானது எல்லாப் புறங்களிலிருந்தும் சதுர செண்டிமீட்டருக்கு 1.25 மெட்ரிக் டன் வீதம் அழுத்திக் கொண்டிருந்தது.கடலுக்குள் மேலும் மேலும் ஆழத்துக்குச் செல்லும் போது அழுத்தம் பயங்கரமாக அதிகரிக்கும். ஆகவே தான் ஆழ்கடல் யாரும் எளிதில் செல்ல முடியாத இடமாக இருந்து வருகிறது.ஆழ்கடல் அழுத்தம் பற்றி மேலும் கூறுவதற்கு முன்னர் காற்றழுத்தம் பற்றிக் கவனிப்போம். நம் தலைக்கு மேலே மிக உயரம் வரை காற்று மண்டலம் உள்ளது. காற்றுக்கும் எடை உண்டு. 

 

நாம் வீட்டுக்குள் இருந்தாலும் சரி, திறந்தவெளியில் இருந்தாலும் சரி, நம் தலைக்கு மேல் உள்ள காற்று அனைத்தும் சேர்ந்து நம்மை அழுத்திக் கொண்டிருக்கிறது. இது (கடல் மட்டத்தில் உள்ள இடங்களில்) ஒரு சதுர செண்டிமீட்டருக்குச் சுமார் ஒரு கிலோ வீதம் உள்ளது. முன்புறம், பின்புறம் என நம் உடலை எல்லாப் பக்கங்களிலும் காற்று மண்டலம் அழுத்திக் கொண்டிருக்கிறது. பழகிப் போனதால் இது நமக்குத் தெரிவதில்லை.

 

(காற்றழுத்தம் இடத்துக்கு இடம் சற்றே மாறுபடுகிறது. ஓரிடத்தில் காற்றழுத்தம் குறைவாக இருந்தால் அது காற்றழுத்தத் தாழ்வு மண்டலமாகும். அப்போது பிற இடங்களிலிருந்து அந்த இடத்தை நோக்கிக் காற்று வீசும். மழை மேகங்கள் இருந்தால் அவையும் அந்த இடத்தை நோக்கி நகரும்.)  காற்றுக்கு எடை உண்டு என்பது போல தண்ணீருக்கும் எடை உண்டு. தலையில் தண்ணீர் குடத்தைச் சுமந்து வருகிறவர்களிடம் கேட்டுப் பாருங்கள், சொல்வார்கள். ஆகவே கடலுக்குள் இறங்கினால் நீரின் எடையும் சேர்த்து நம்மை அழுத்தும்.நீருக்குள் சுமார் 10 மீட்டர் ஆழத்துக்கு இறங்கினால் கடல் மட்டத்தில் உள்ளதை விட அழுத்தம் இரண்டு மடங்காகி விடும். 20 மீட்டர் ஆழத்தில் மூன்று மடங்காகி விடும். 30 மீட்டர் ஆழத்தில் அழுத்தம் நான்கு மடங்காகி விடும். கடலுக்குள் மேலும் மேலும் ஆழத்துக்குச் செல்லும்போது அழுத்தம் இதே விகிதத்தில் அதிகரித்துச் செல்லும். மிகமிக ஆழத்தில் உள்ள அழுத்தத்தை ஒரு சதுர செண்டிமீட்டருக்கு இவ்வளவு டன் என்று கூற வேண்டியிருக்கும்.ஆகவே மனிதன் கடலுக்குள் இஷ்டம் போல ஒரு கிலோ மீட்டர், இரண்டு கிலோ மீட்டர் ஆழத்துக்கு ஒரு போதும் இறங்க முடியாது. அப்படி இறங்க முயன்றால் கடும் அழுத்தம் காரணமாக அவர் சட்னி ஆகி விடுவார்.டிவியில் டிஸ்கவரி சேனல், நேஷனல் ஜியோகிரபிக் சேனல் போன்றவற்றில் பலர் சுவாசக் கருவியை அணிந்து கடலுக்குள் இஷ்டம் போல வளைய வளைய நீந்தி வருகின்ற காட்சிகளை நீங்கள் பார்த்திருக்கலாம். இவையெல்லாம் 10 மீட்டர் ஆழம் வரைதான்.ஸ்குபா எனப்படும் சுவாசக் கருவி உள்ளது. இதை அணிபவர் காற்றுக் கலவை அடங்கிய சிலிண்டரை முதுகில் கட்டிக் கொண்டிருப்பார். கால்களில் துடுப்புகள் இருக்கும். உடலை ஒட்டிய விசேஷ ஆடையை அணிந்திருப்பார். நீருக்குள் இறங்குவதற்கென எடையை உடலோடு சேர்த்துக் கட்டிக் கொண்டிருப்பார்.இப்படியான சுவாசக் கருவியை அணிந்து கொண்டு கடலுக்குள் இறங்குவதற்கும் நிபுணரின் மேற்பார்வையிலான பயிற்சி தேவை. குறிப்பிட்ட உடல் தகுதியும் வேண்டும். குறிப்பிட்ட ஆழத்துக்கு இறங்கினால் அங்கு எவ்வளவு நேரம் இருக்க வேண்டும் என்பதற்கெல்லாம் விதிமுறை உள்ளது. சுவாசக் கருவி அணிந்து கடலில் இறங்குவதில் நிபுணரான ஒருவர் சென்ற அதிகபட்ச ஆழம் வெறும் 318 மீட்டர். 

 

ஆகவே பிக்கார்டும் வால்ஷும் ஒரு கோளத்துக்குள் அமர்ந்து சேலஞ்சர் மடுவுக்குள் இறங்கியதில் வியப்பில்லை. கடல் அடியில் நிலவும் கடும் அழுத்தத்தைத் தாங்கி நிற்க, அந்தக் கோளம் சுமார் 12 செண்டிமீட்டர் தடிமன் கொண்ட உருக்கினால் தயாரிக்கப்பட்டிருந்தது. அதன் எடை மட்டும் 13 டன்.இவ்வளவு எடை கொண்ட கோளம் உள்ளே இறங்கினால் அது பின்னர் மேலே வரவேண்டுமே? ஆகவே அந்தக் கோளம் சுமார் 15 மீட்டர் நீளமுள்ள தொட்டிக்கு அடியில் இணைக்கப்பட்டிருந்தது. தொட்டியில் பல ஆயிரம் லிட்டர் பெட்ரோல் நிரப்பப்பட்டிருந்தது. தவிர, அந்தத் தொட்டியின் இரு புறங்களிலும் இருந்த துணைத் தொட்டிகளில் தண்ணீர். இந்தத் தொட்டி நீருக்குள் இறங்கியாக வேண்டும். ஆகவே இன்னும் கூடுதலாக எடை சேர்த்தால்தான் தொட்டியும் அத்துடன் கோளமும் பாதாளத்துக்கு இறங்கும். ஆகவே கோளத்துடன் கெட்டியாக மூடப்பட்ட இரு ‘அண்டாக்கள்’ இணைக்கப்பட்டிருந்தன. இரு அண்டாக்களிலும் ஏராளமான இரும்புக் குண்டுகள் இருந்தன. இவற்றின் மொத்த எடை 9 டன்.பிக்கார்டும் வால்ஷும் சேலஞ்சர் மடுவில் தங்கள் பணியை முடித்துக்கொண்ட பின்னர் பொத்தானை அழுத்தினர். அண்டாக்களிலிருந்து இரும்புக் குண்டுகள் அனைத்தும் கொஞ்சங் கொஞ்சமாக ஒரு திறப்பு வழியே வெளிப்பட்டு கடலில் விழ ஆரம்பித்தன. எடை குறையக் குறைய டிரியெஸ்டி கலம் மேலே வர ஆரம்பித்தது. பெட்ரோல் அடங்கிய தொட்டி என்பதால் அது கடைசியில் மேலே வந்து மிதந்தது. பிக்கார்டும் வால்ஷும் கோளத்திலிருந்து மீட்கப்பட்டனர்.

 

இவர்கள் சாதனை நிகழ்த்திய 50 ஆண்டுகளுக்குப் பிறகு பிரபல ஹாலிவுட் டைரக்டரும் கடல் ஆராய்ச்சி ஆர்வலருமான ஜேம்ஸ் கேமரான் 2012, மார்ச் 26 அன்று நவீன நீர் மூழ்கு கலம் ஒன்றின் மூலம் அதே சேலஞ்சர் மடுவில் இறங்கினார். அவர் இறங்கிய இடத்தின் ஆழம் 10,898 மீட்டர்.

 

பூமிக்கு மேலே சுமார் 300 கிலோ மீட்டர் உயரத்தில் பறக்கின்ற விண்கலங்களிலிருந்து எண்ணற்றவர்கள் காப்பு உடையுடன் வெளியே வந்து, அந்தரத்தில் மிதந்து பணியாற்றி சாதனை படைத்துள்ளனர். ஆனால் கடலில் மிக ஆழமான இடத்துக்குச் சென்று சாதனை புரிந்தவர்கள் இதுவரை மூவர் மட்டுமே. ஆழ்கடல் என்றுமே மனிதன் எளிதில் அண்ட முடியாத இடமாகவே இருந்து வரும்.

 

என்.ராமதுரை

எடிசன்

எடிசன் பிறந்து 4 ஆண்டுகள் வரை பேச்சே வரவில்லை. அவருடைய தலை மற்றவர்களை விடச் சற்றுப் பெரிதாக இருந்தது. எடிசனின் அம்மாவுக்குத் தன் குழந்தையை நினைத்து கவலை. அதே நேரம் எடிசனை மிகவும் கனிவோடும் அக்கறையோடும் கவனித்துக் கொண்டார். 

 

ஒருநாள் எடிசன் வாத்து முட்டைகளின் மீது அமர்ந்து அடைகாத்துக் கொண்டிருந்தார்! அதைப் பார்த்த அம்மா, ‘என் மகன் பெரிய விஞ்ஞானியாவான்’ என்று எடிசனை அணைத்துக் கொண்டார்.  பேச்சு வந்ததிலிருந்து கேள்வி கேட்டுக்கொண்டே இருந்தார் எடிசன். அவருடைய கேள்விகளுக்குப் பதில் சொல்ல முடியாமல் எல்லோரும் ஓடினார்கள். ஏழு வயதில் எடிசனைப் பள்ளியில் சேர்த்தனர். அவருடய தலையைப் பார்த்து ஆசிரியர் கேள்வி கேட்டார். அருகில் இருந்த மாணவர்கள் சிரித்தனர். வகுப்பில் எப்போதும் கேள்வி கேட்டுக்கொண்டிருந்த எடிசனை அந்த ஆசிரியருக்குப் பிடிக்காமல் போனது. ஒருநாள் பாடம் நடத்திக் கொண்டிருந்தபோது எடிசன் படம் வரைந்து கொண்டிருந்தார். இதைக் கண்ட ஆசிரியர், ‘மூளை வளர்ச்சியடையாதவன், முட்டாள்’ என்று திட்டினார். விஷயத்தைக் கேள்விப்பட்ட அம்மா, அவருக்கு வீட்டிலேயே படிப்புச் சொல்லித் தந்தார். படிப்பதில் தீராத ஆர்வம் ஏற்பட்டது. 11 வயதுக்குள் இலக்கியம், வரலாறு, அறிவியல் எல்லாம் படித்துவிட்டார். குறிப்பாக ரசாயனப் புத்தகங்கள் மீது கூடுதல் ஆர்வம். பரிசோதனைக் கூடத்தை வீட்டில் அமைத்துக்கொண்டு, அறிவியல் சோதனைகளைச் செய்ய ஆரம்பித்தார். 

 

அன்று தொடங்கிய அவரது கண்டுபிடிப்பு முயற்சிகள் அவரது இறுதிக் காலம் வரை தொடர்ந்தன. தன் வாழ்நாளில் சுமார் 1,500 கண்டுபிடிப்புகளை நிகழ்த்தி, 1,368 பொருள்களுக்குக் காப்புரிமைகளைப் பெற்றார்! உலகின் மிக உன்னதமான விஞ்ஞானிகளில் ஒருவராக ஜொலிக்கிறார்!

 

வெற்றிக்கான எடிசன் சொன்ன மூன்று மந்திரங்கள்: முயற்சி, முயற்சி, முயற்சி!

 

உயிர்களிடத்தில் அன்பு வேணும் - தெய்வம் 

உண்மையென்று தானறிதல் வேணும் - பாரதியார்
 

7 ஓவர் கிரிக்கெட்!

 

டெஸ்ட், 50 ஓவர், டி20க்கு அடுத்ததாக கிரிக்கெட்டுக்கு ஏழு ஓவர் மேட்ச் என்ற புதிய போட்டி அறிமுகமாகவுள்ளது. 7பிஎல் என்றழைக்கப்படும் இந்தப் போட்டி துபாயில் மார்ச் மாதத்தில் நடக்கவுள்ளது. ஐக்கிய அரபு அமீரகத்தின் அபுதாபி, அஜ்மன், துபை, ஃபுஜைரா, ஷார்ஜா, ரஸ் அல்-கைமா, உம் அல்-கைவைன் ஆகிய ஏழு அணிகள் போட்டியில் பங்கேற்கின்றன. ஐபில் போல எல்லா நாட்டு வீரர்களும் பங்கேற்று ஆடுவார்கள் என்று எதிர்பார்க்கப்படுகிறது. ஐபிஎல்-லில் தேர்வாகாத வீரர்களுக்கு 7பிஎல் நல்ல வாய்ப்பாக அமையும். ஏற்கெனவே டி20யில் சிக்ஸர்களும் ஃபோர்களுமாகப் பறக்கின்றன. ஏழு ஓவர் கிரிக்கெட்டில் கேட்கவே வேண்டாம். ஏழு ஓவர் கிரிக்கெட்டால் ஒரே பலன், மேட்ச் ஒன்றரை மணி நேரத்துக்குள் முடிந்துவிடும்.

 

2015 உலகக் கோப்பையில் தோனிதான் கேப்டனாக இருப்பார் என்று ஒருவர் சொல்லியிருகிறார். வேறு யார், தோனியேதான்! ‘அடுத்த ஒரு ஆண்டுக்குள் உலகக் கோப்பை போட்டி தொடங்கவுள்ளது. இந்திய அணியின் கேப்டனாக புதிதாக ஒருவர் தலைமை ஏற்க இது சரியான நேரம் அல்ல. உலகக் கோப்பைத் தொடருக்கு முன் 70 முதல் 90 ஆட்டங்களில் தலைமையேற்ற அனுபவம் இருந்தால்தான் கோப்பையை வெல்ல முடியும். மற்றவர்களை விட ஒரு கேப்டன் அனுபவம் நிறைந்தவராக இருக்க வேண்டும். ஓராண்டு இடைவெளிக்குள், புதிதாக ஒருவரை கேப்டனாக நியமித்து, அவர் தலையில் பொறுப்பைச் சுமத்துவது நியாயமற்றது’ என்று கூறியிருக்கிறார் தோனி. இதன்படி பார்த்தால் உலகக் கோப்பையில் தோனிதான் இந்திய கேப்டனாக இருக்கமுடியும்!ஆஷஸ் தொடரை ஆஸ்திரேலியா அணி வெல்லும் என்று எதிர்பார்த்திருக்கலாம். ஆனால் ஐந்து டெஸ்ட் மேட்சுகளிலும் ஜெயிப்பார்கள் என்று யாராவது நினைத்திருக்க முடியுமா? இதற்கு முந்தைய ஆஷஸ் தொடரை இழந்த ஆஸ்திரேலியா இந்தமுறை சொந்த மண்ணில் இங்கிலாந்தைப் பழிக்குப் பழி வாங்கிவிட்டது. இந்தத் தொடரில் 37 விக்கெட்டுகளை வீழ்த்திய ஜான்சன், தொடர் நாயகன் விருதை வென்றார். பலம் வாய்ந்த அணியான இங்கிலாந்துக்கு இது மிகப் பெரிய நெருக்கடி.

அழகிரி விவகாரம் - குழப்பம்

ஒரு வலுவான கூட்டணியை அமைத்து நாடாளுமன்றத் தேர்தலைச் சந்திக்கும் முயற்சியில் இறங்கியிருக்கும் தி.மு.க.வுக்கு அழகிரி விவகாரம் பெரிய பின்னடைவாக வந்திருக்கிறது. அதிரடி நடவடிக்கையாக அழகிரியை கட்சியை விட்டுத் தாற்காலிகமாக நீக்கியிருந்தாலும் அவரால் பல சங்கடங்களைக் கழகம் சந்திக்கும் என்று மீடியாக்கள் பீதியைக் கிளப்பி வருகின்றன. அவ்வப்போது தி.மு.க.வைக் கலக்கும் அழகிரி விவகாரத்தை எவ்வாறு கையாண்டால், கட்சியின் எதிர்காலத்துக்கு நல்லது என்று அலசுகிறது இந்தக் கட்டுரை.

தென்மண்டல அமைப்புச் செயலாளரான மு.க.அழகிரி முறையற்ற விவாதங்களில் நேரடியாக ஈடுபட்டும் கழகச் செயல் வீரர்களைப் பணியாற்ற வேண்டாம் என்றும் குழப்பம் விளைவித்த காரணத்தால், சாதாரண உறுப்பினர் பொறுப்பில் இருந்தும் அவர் தாற்காலிகமாக நீக்கி வைக்கப்படுகிறார்," என்று பொதுச் செயலாளர் அன்பழகன் வெளியிட்ட அறிக்கையில் குறிப்பிடப்பட்டு இருந்தது.ஸ்டாலின் ஆதரவு பிரமுகர்கள் மீது வன்கொடுமை சட்டத்தின் கீழ் புகார் கொடுத்து வழக்கைப் பதிவுசெய்யக் காரணமாக இருந்த மதுரைப் புறநகர்ப் பகுதியைச் சேர்ந்த அழகிரி ஆதரவாளர்கள் ஐந்து பேரை கட்சியை விட்டு இடைநீக்கம் செய்தார் கருணாநிதி. இதுகுறித்து காலை ஏழு மணிக்கே கருணாநிதியிடம் குமுறப்போன அழகிரி நான்கு மணி நேரத்துக்குள்ளேயே தம்மைக் கட்சியை விட்டு தாற்காலிகமாக நீக்குவார்கள் என்று எதிர்பார்த்து இருக்கமாட்டார்.கருணாநிதியை அழகிரி நேரடியாகச் சந்தித்தபோது ஆவேசமான வார்த்தைகளையும் மீறிய செயல்கள் அரங்கேற்றப்பட்டதாகவும் இனியும் பொறுப்பதில்லை" என்றே அழகிரியைத் தாற்காலிகமாக நீக்கும் முடிவு எடுக்கப்பட்டதாகவும் கழகப் பிரமுகர்கள் சொல்கிறார்கள். தேர்தல் நெருங்கும் இந்தச் சூழலில் இதுபோன்ற சர்ச்சை வந்துவிட்டதே என்று படபடக்கிறார்கள் அவர்கள்.இதுபோன்ற கொந்தளிப்புகளை இனியும் கழகத்தை உலுக்க அனுமதிக்கக்கூடாது என்று புலம்புகிறார்கள். அவ்வப்போது தலைதூக்கும் இந்தப் பிரச்னையில் ஒரு நிரந்தரத் தீர்வாக, உச்சகட்ட நடவடிக்கை எடுக்க தலைவர் தயங்கக்கூடாது என்றும் அவர்கள் சொல்கிறார்கள்.

ஸ்டாலின் ஆதரவாளர்களுக்கும் அழகிரி ஆதரவாளர்களுக்கும் மதுரையில் நடக்கும் தொடர் மோதலில் இந்த சீஸனின் தொடக்கமாக அழகிரி ஆதரவாளர்களைக் கொண்ட மதுரை மாநகர தி.மு.க. கலைக்கப்பட்டது. ஸ்டாலின் ஆதரவாளர்களைக் கொண்ட புதிய பொறுப்புக் குழு போடப் பட்டது. அழகிரி ஆதரவாளர்கள் அடித்த பரபரப்புப் போஸ்டரைத் தொடர்ந்து அவர்கள் கட்சியை விட்டு இடைநீக்கம் செய்யப்பட்டார்கள்.கொதித்துப் போன அழகிரி, அவரது ஆதரவாளர்களை நீக்கியதைக் கண்டித்து பேட்டி கொடுத்தது மட்டுமல்லாமல் தே.மு.தி.க.வை வளைத்துப் போடும் முயற்சியில் இருந்த தி.மு.க.வுக்கு ஸ்பீடு பிரேக்கர் போடும்வகையில் விஜயகாந்தையும் விமர்சித்தார். இதைவிட மிக முக்கியமாக, ஸ்டாலினை ஒருபோதும் தலைவராக ஏற்றுக்கொள்ளமாட்டேன் என்று அழகிரி சொன்னது குறிப்பிடத்தக்கது.இந்தப் பேட்டியைக் கண்டு அதிர்ச்சியடைந்த கட்சித் தலைமை என்ன நடவடிக்கை எடுப்பது என்று தெரியாமல் விழித்தது. பிறகு வெளிநாடு சென்று விட்டார் அழகிரி. இதற்கு இடையில்தான் வன்கொடுமை சட்டத்தின் கீழ் ஸ்டாலின் ஆதரவாளர்கள் மீது வழக்குப் பதிவு செய்யப்பட்டது. தொடர்ந்து கருணாநிதியுடன் அழகிரி சந்திப்பு, தாற்காலிக நீக்கம் என்று பல திருப்பங்கள் நடந்தன.தி.மு.க.வில் ஜனநாயகமில்லை; தேர்தலில் தி.மு.க. தோற்றுப் போகும்; தி.மு.க.வின் சொத்துக்களை அபகரிக்கப் பார்க்கிறார்கள்," என்று அடுக்கடுக்காகக் குற்றச்சாட்டுக்களை வீசி, கழக வட்டாரத்தைக் கலக்கினார் அழகிரி.

அதுமட்டுமல்லாமல் தமிழகம் முழுதுமுள்ள கழகப் பிரமுகர்களைத் தொடர்பு கொண்டு தமது தரப்பு நியாயத்தைச் சொல்லி ஆதரவைத் தேடி வருகிறார். அழகிரியால் கழகத்துக்கு ஏற்பட்டுள்ள இந்தத் தலைவலி, திருகுவலியாக மாறாமல் ஒரு தீர்க்கமான முடிவை எடுக்கவேண்டிய நிலைக்குத் தி.மு.க. தள்ளப்பட்டு இருக்கிறது.ஆனால், அழகிரி மேல் கடுமையான நடவடிக்கை எடுத்தால், தென்மாவட்டத்தில் தி.மு.க.வுக்கு ஏதேனும் பாதிப்பு வருமா என்ற சந்தேகமும் ஊசலாடிக் கொண்டு இருக்கிறது.மிசா கால சிறைவாசம் முதல் கழகத்துக்காகப் பாடுபட்டு, படிப்படியாக கழக ஏணியில் உயர்ந்தவர் ஸ்டாலின். காலவோட்டத்தில் கழகம் ஸ்டாலினை எதிர்காலத் தலைவராக ஏற்றுக்கொண்டு இருக்கிறது என்பதை யாரும் மறுக்கமுடியாது. ஆனால், அதேசமயம், அழகிரி கழகப் பணிக்காகத் தமது வாழ்வை அர்ப்பணித்தவர் கிடையாது. மதுரையில் முரசொலி பதிப்பைக் கவனித்துக்கொள்ள அனுபப்பட்டவர்தான் அவர். பல வருடங்கள் தமது வியாபாரம், வர்த்தகம் என்று ஈடுபட்டு இருந்தவர்தான் அவர்.ஆனால், 1992 -93ல் வைகோ விவகாரம் வெடித்தபோது தென் மாவட்டங்களில் தி.மு.க.வுக்கு ஏற்படவிருந்த பாதிப்பைக் குறைக்கும்விதமாக பலவித முயற்சிகளில் இறங்கினார் என்பது உண்மை. இருந்தும் அதற்குப் பின் அமைந்த அவரது சில நடவடிக்கைகள் எல்லாம் கழகத்துக்குப் பாதகமாகவே அமைந்துவிட்டன.2000ஆம் வருடத்தில் கட்சி விரோத நடவடிக்கைக்காக இதே போன்று தாற்காலிகமாக நீக்கப்பட்டார் அழகிரி. அதனால் கடுப்படைந்த அவர் 2001ஆம் ஆண்டு நடந்த சட்டமன்றத் தேர்தலில் மூன்று தொகுதிகளில் தி.மு.க.வைத் தோற்கடிக்கப் பாடுபட்டார் என்பது மதுரை கழகத் தொண்டர்களுக்குத் தெரிந்த விஷயம்.தலைமையுடன் உரசல் தொடர்ந்த நிலையில், 2003 தா.கிருஷ்ணன் கொலை வழக்கில், அழகிரி கைதாக, கலைஞரின் தந்தைப் பாசம், மகனை அரவணைத்துவிட்டது. அழகிரி மீண்டும் தென்பகுதி தி.மு. க.வின் முக்கிய அங்கமாகச் செயல்படத் தொடங்கினார். மதுரையில் அழகிரியின் ஆட்கள், ரவுடி ராஜ்ஜியம் நடத்துகிறார்கள் என்று பெயர்களைக் குறிப்பிட்டு தேர்தல் பிரசாரத்தில் ஜெயலலிதா வெளிப்படையாகவே பேசினார்.அழகிரி ஆதரவாளர்களின் செயல்பாடுகளால், கழகத்தின் மீது மக்களுக்கு வெறுப்புதான் வளர்ந்தது. பணம் கொடுத்து வோட்டு வாங்கும் திருமங்கலம் ஃபார்முலாவை அறிமுகப்படுத்தி, தேர்தல் ஜனநாயகத்தை கேவலப்படுத்தியது அழகிரி தரப்பு தான். மாறன் சகோதரர்களுடன் மோதல் ஏற்பட்டபோது, பத்திரிகை அலுவலகத்தைக் கொளுத்தியதுடன், மூன்று பேர் இறக்கக் காரணமாக இருந்தது இந்த வன்முறைக் கும்பலே என்பதை மாறன் சகோதரர்கள் மறந் திருந்தாலும் மதுரை மக்கள் மறக்க மாட்டார்கள்.

2011ல் தி.மு.க. தோற்ற பிறகு, இந்த இரண்டரை வருட காலம் எங்கே இருந்தார் என்று தேடவேண்டிய நிலையில்தான் அஞ்சாநெஞ்சனான அழகிரி இருந்தார். இந்தக் காலகட் டத்தில்தான், அவரது ஆதரவாளர்கள் பலர் ‘இனியும் இவரை நம்பிப் பயனில்லை’ என்று ஸ்டாலின் ஆதரவாளர்களாக மாறிவிட்டனர்.  இப்போதைய நிலையில், கழகத் தொண்டர்களிடம் மத்தியில் மட்டுமல்லாமல், சாதாரண பொதுமக்கள் கூட அழகிரியின் பெயரைச் சொன்னால், தங்களது கடுப்பைக் காட்டுகிறார்கள் என்பதுதான் யதார்த்தம். இந்தச் சூழலில்தான் கழகக் குடும்பத்தில் குழப்பத்தைக் கிளப்பியிருக்கிறார் அழகிரி.தி.மு.க. தேர்தலில் தோற்றுப்போகும் என்று எப்போது அழகிரி சொன்னாரோ இந்த மோதல், அழகிரிக்கும் கட்சிக்குமான மோதலாக மாறிவிட்டது (அப்படிச் சொல்லவில்லை என்று மறுத்திருக்கிறார் அழகிரி). கட்சி தோற்கும் என்று அவர் சொன்னபோது தொண்டர்கள் கொதித்துப் போய்விட்டார்கள். இப்போது அவர் என்ன செய்கிறார் என்றால், ஒவ்வொரு மாவட்டத்திலும் உள்ள விரல் விட்டு எண்ணக்கூடிய அளவில் இருக்கும் அதிருப்தியாளர்களைத் தொடர்புகொண்டு, ஆதரவு தேடி வருகிறார். அப்படி அவர் தொடர்புகொள்ளும் ஆதரவாளர்கள், கட்சிக்குத் துரோகம் செய்பவர்களாகவும் கிரிமினல் குற்றவாளிகளாகவும்தான் இருக்கிறார்கள். தலைவர் தமது மகனை ஒருபோதும் விட்டுக்கொடுக்க மாட்டார் என்றும் கூடியவிரைவில் சமரசம் ஏற்படும் பட்சத்தில் அழகிரி தமது ஆதரவு பிரமுகர்களுக்கு கட்சிப் பொறுப்பு மற்றும் தேர்தலில் போட்டியிட வாய்ப்புப் பெற்றுத்தருவார் என்றும் அழகிரி ஆதரவாளர்கள் கருதுகிறார்கள்.

துணைவேந்தர்கள் இல்லாமல் பரிதவிக்கும் மாணவர்கள்!

கட்சி என்றால் தலைவர் இருக்க வேண்டும். நிறுவனம் என்றால் நிர்வாகி இருக்க வேண்டும். கல்லூரி என்றால் முதல்வர் இருக்க வேண்டும். அதுபோல பல்கலைக்கழகம் என்றால் துணைவேந்தர் இருக்க வேண்டும். அப்போது தான் அதன் ஒட்டுமொத்த நிர்வாகமும் சிக்கலின்றி இயங்கும். ஆனால் தமிழகத்தில் நான்கு பல்கலைக் கழகங்களில் துணைவேந்தர் பதவி காலியாக உள்ளது. இதனால் படித்து முடித்த மாணவர்கள் பரிதவிக்கிறார்கள்.

தமிழகத்தில் சென்னைப் பல்கலைக்கழகம், பாரதியார், பாரதிதாசன், மதுரை காமராஜர், மனோன்மணியம் சுந்தரனார், பெரியார், அண்ணாமலை, அழகப்பா, அன்னை தெரசா, தமிழ்ப் பல்கலைக்கழகம், திருவள்ளுவர் பல்கலைக்கழகம், தமிழ்நாடு பல்கலைக் கழகம், தமிழ்நாடு ஆசிரியர் கல்வியியல் பல்கலைக்கழகம், தமிழ்நாடு உடற்கல்வி மற்றும் விளையாட்டுப் பல்கலைக்கழகம், அண்ணா பல்கலைக்கழகம், தமிழ்நாடு வேளாண் பல்கலைக்கழகம், தமிழ்நாடு கால்நடைப் பல்கலைக்கழகம், தமிழ்நாடு டாக்டர் அம்பேத்கர் சட்டப் பல்கலைக்கழகம், தமிழ்நாடு டாக்டர் எம்.ஜி.ஆர். மருத்துவப் பல்கலைக்கழகம் என முக்கிய பல்கலைக்கழகங்கள் உள்ளன. 

இந்தப் பல்கலைக்கழகங்களின் கட்டுப்பாட்டில் கணிசமான எண்ணிக்கையிலான கல்லூரிகள் செயல்படுகின்றன. அதில் பல்லாயிரக்கணக்கான மாணவ, மாணவியர் பயின்று வருகிறார்கள். கல்லூரிகளின் செயல்பாடுகளைக் கவனிக்கவும், கண்காணிக்கவும், மாணவர்கள் நலனைப் பாதுகாக்கவும் பல்கலைக்கழகத்துக்குத் தலைமை தேவை. அதாவது துணைவேந்தர் தேவை. ஆனால் திருச்சி பாரதிதாசன் பல்கலைக்கழகத் துணைவேந்தர் பணியிடம் கடந்த ஜூலை முதல் காலியாக உள்ளது. தமிழ்நாடு கால்நடை அறிவியல் பல்கலைக்கழகத் துணைவேந்தர் பதவி அக்டோபரில் இருந்து காலியாக உள்ளது. சேலம் பெரியார் மற்றும் காரைக்குடி அழகப்பா பல்கலைக்கழகங்களின் துணைவேந்தர் பதவிகளும் செப்டெம்பர் முதல் காலியாக உள்ளன.

இந்தப் பல்கலைக் கழகங்களுக்கான துணைவேந்தரைத் தேர்வு செய்வதற்கான குழுக்கள் அமைக்கப் பட்டன. இந்தக் குழுக்களும் விவாதித்தன. ஆனால் துணைவேந்தரை நியமனம் செய்வதில்தான் அநியாய காலதாமதம். இந்த நிலையில் ‘தகுதியானவர்களைத் தான் துணைவேந்தர்களாக நியமிக்க வேண்டும்’ என பேராசிரியர் கிருஷ்ணசாமி என்பவர் உயர் நீதிமன்றத்தில் பொதுநல வழக்குத் தொடர்ந்துள்ளார். 2013 டிசம்பர் 9ம் தேதி விசாரணைக்கு வந்த இந்த வழக்கு பிப்ரவரி 27ம் தேதிக்குத் தள்ளி வைக்கப்பட்டிருக்கிறது. இந்த வழக்குதான் துணைவேந்தர் நியமனம் காலதாமதமாவதற்குக் காரணமாக உள்ளது என்ற பேச்சு உள்ளது.

அரசியல் செல்வாக்கு, சாதி, பணம் ஆகியவற்றின் அடிப்படையில் மட்டுமே கடந்த பத்தாண்டுகளாகத் தமிழகத்தில் துணைவேந்தர் பதவிகள் நிரப்பப்பட்டு வருகின்றன. துணைவேந்தராக ஒருவர் நியமிக்கப்பட என்னென்ன நடைமுறைகளைப் பின்பற்ற வேண்டும் எனப் பல்கலைக்கழக மானியக்குழு (யு.ஜி.சி) 2009-ம் ஆண்டு விதிமுறைகளை வகுத்தது. அதில் முக்கியமான தகுதி, ‘துணைவேந்தராக நியமிக்கப்படுபவர் பல்கலைக்கழகத்தில் பத்தாண்டுகள் பேராசிரியராகப் பணியாற்றி இருக்க வேண்டும். அல்லது அதற்கு இணையான தகுதி பெற்றிருக்க வேண்டும்’ என்பது தான். ஆனால் இதைக்கூட புறந்தள்ளிவிட்டு துணை வேந்தர்கள் நியமிக்கப்படுகிறார்கள். இப்போது தமிழகத்திலுள்ள சில துணைவேந்தர்கள் இந்தத் தகுதியைப் பெற்றிருக்கவில்லை. பல்கலைக்கழக மானியக் குழு நிர்ணயித்த சம்பள விகிதத்தைப் பெற்றுக் கொள்ளும் துணைவேந்தருக்கு அந்தக்குழு (யு.ஜி.சி) நிர்ணயித்த கல்வித் தகுதி இருக்க வேண்டும்’ என அரசு கருதாதது வெட்கமாக இருக்கிறது. பல்கலைக்கழக பியூனுக்குக்கூட தகுதிகள் நிர்ணயிக்கப்பட்டு நடைமுறைப்படுத்தப்படுகிறது. அப்படி இருக்கையில் பல்கலைக்கழகத்தையே நிர்வகிக்கும் துணைவேந்தருக்குத் தகுதியைப் பின்பற்றவில்லையென்றால் என்ன அர்த்தம்?

 

அருள்வாக்கு - ஸிவிலிஸேஷனை ரட்சிக்கும் சக்தி?!

 

இந்தத் தேசத்தின் உசந்த ஸமுதாயம், மேலெழ வெளியிலே பார்க்கிறதற்கு மட்டும் ஒருமைப்பாட்டு கோஷம் என்ற ஒரு ‘ஷோ’ வோடு, உள்ளுக்குள்ளே பிரிந்து, பிரிந்து, பிரிந்து வீணாய்ப் போய்க் கொண்டிருக்கிறது. ரொம்பவும் துக்கமும் வெட்கமும் படும்படியான ஸ்திதி, பொது எதிரி ஒருத்தன்கிட்டே விரோதத்தில்தான் நமக்கு ஒன்று சேரத் தெரிந்ததே தவிர நமக்குள்ளே பரஸ்பர ப்ரேமையில் ஒன்று சேரத் தெரியவில்லை!அப்போது வெளிப்பார்வைக்காவது ஸாத்விகமாகச் சண்டை நடந்த மாதிரி இல்லாமல், இப்போது வெளியிலேயும் அஸுர யுத்தமாகவே நடந்து, யதுகுலம் மாதிரி நம்மை நாமே நிர்மூலம் பண்ணிக் கொள்வதில்தான் இது போய் முடியுமோ என்று பயப்படுகிற ஸ்திதி ஏற்பட்டிருக்கிறது.

 

இந்த அபாயத்தை இப்போதுள்ள அநேகக் கட்சிகளுடைய, வர்க்கங்களுடைய தலைமை ஸ்தானத்திலிருப்பவர்கள் தெரிந்து கொண்ட ப்ரக்ஞையே இல்லாமல் போக்கொண்டிருப்பதுதான் ரொம்பவும் விசாரம் தருவதாக இருக்கிறது. தர்மம் என்று ஒன்று இருக்கிறது... ஜனங்களுக்கு இருக்க வேண்டிய அநேக நல்லொழுக்கங்கள் சொன்னேனே, அவை எல்லாமும் அதோடு இன்னும் பலவும் சேர்ந்துதான் தர்மம், தர்மம் என்கிறது. இந்தப் பாரத தேச கலாசாரத்துக்கு லோகத்திலேயே வேறே எந்தப் பெரிய ‘ஸிவிலிஸேஷ’னுக்கும் இல்லாத தீர்க்காயுஸைக் கொடுத்து யுகாந்தரங்களாக ரட்சித்துக் கொண்டு வந்திருக்கிறது அந்த தர்ம சக்திதான். அப்படி ஒன்று இருக்கிறது என்று தப்பித் தவறியாவது தற்காலத்தில் தலைவர்கள் என்று இருக்கிறவர்கள் தங்கள் தங்கள் கட்சிக்காரர்களுக்குச் சொல்கிறார்கள் என்று தெரியவில்லை. எலெக்ஷனில் ஜயிப்பது ஒன்றைத் தவிர வேறே ஒரு லட்சியத்தையும் கட்சிக்காரர்களுக்குச் சொல்லிக் கொடுப்பதில்லை என்ற துர்தசை ஏற்பட்டிருக்கிறது. ஜயிப்பதுதான் குறி என்கிறபோது Hook or crook, எதுவானாலும் ஸரீ என்று அதர்மத்துக்கும் கட்சிக்காரர்களைத் தூண்டிக் கொடுக்கிற வரைக்கும் போய்விடுகிறது. தலைவர்கள் என்கப்பட்டவர்களும் ஸமுதாயத்தை அநேக மெஜாரிட்டி மைனாரிட்டிகளாக Divide பண்ணி, மெஜாரிட்டியைத் திருப்தி பண்ணுவதற்காக தர்மா தர்மத்தைப் பற்றி அவ்வளவாகக் கவலைப்படாமல் எதுவேண்டுமானாலும் பண்ணி எலெக்ஷன் வெற்றிக்கே பாடுபடுவதாகத்தான் பொதுப்படையாகப் பார்க்கிறபோது தெரிகிறது.

ஜகத்குரு காஞ்சி காமகோடி ஸ்ரீ சந்திரசேகரேந்திர சரஸ்வதி சங்கராச்சார்ய ஸ்வாமிகள்

அருள்வாக்கு - வாழ்க்கை என்கிறது என்ன?

பல தினுஸான சலனங்கள்தான் வாழ்க்கை. இப்போது இருப்பது நாளைக்கு இல்லை என்று மனஸாலேயும், வாக்காலேயும், சரீரத்தாலேயும், புத்தியாலேயும், பணத்தாலேயும் பல தினுஸான காரியங்களைப் பண்ணி மாறிக்கொண்டே இருப்பதுதான். ஆலோசித்துப் பார்த்தால் தெரியும், Life என்பது – Movementதான் என்று. இதிலே சரீரத்தினால் தெரியும் மூவ்மென்டுகள்தான் பளிச்சென்று தெரிவது. அதிலேயும் சரீரம் முழுவதையும், ஓரிடத்திலிருந்து இன்னொன்றுக்கு மாற்றிப் பிரயாணம் பண்ணுகின்றோமே, அதுதான் முக்கியமான ‘மூவ்மென்டாக’ த் தெரிகிறது. அதைத்தான் ‘ப்ரவேசே நிர்கமே ததா’ என்று சொல்லியிருக்கிறது. ‘ப்ரவேஸம்’ ஒரு இடத்துக்குள்ளே போவது. ‘நிர்கமம்’ ஓரிடத்திலிருந்து புறப்பட்டு வெளியில் போவது.இப்படியே எந்தவிதமான மூவ்மென்டாலும் ஏதோ ஒரு விஷயத்துக்குள் ப்ரவேச்சிக்கிறோம்; ஏதோ ஒன்றை விட்டுவிட்டுப் புறப்படவும் செய்கிறோம். இவை எல்லாவற்றிலும் ஒருத்தனுக்கு இடைஞ்சல் வராது. வாழ்க்கையைச் சலனம் என்று சொன்னேன். இன்னொரு ‘டெஃபனிஷன்’ (இலக்கணமும்) சொல்லுகிறதுண்டு. பத்திரிகைகளில் அந்த ‘டெஃபனிஷன்’தான் ரொம்பவும் அடிபடுகிறது. வாழ்க்கைப் போராட்டம், வாழ்க்கைப் போராட்டம் என்றே நிறைய கேட்கிறோம். டார்வின் தியரி, ஹெர்பர்ட் ஸ்பென்ஸர் தியரி எல்லாமே போராடிப் போராடித் தான் ஜீவகுலம் உருவாயிருக்கிறது என்றே சொல்கின்றன.யோசனை பண்ணிப் பார்த்தால் சலனமும், போராட்டமும் ஒன்றுக் கொன்று ‘கனெக்ஷன்’ உள்ளவை என்று தெரியும். யாரோ ஒரு ஜீவனுக்கு மட்டும் சலனம். மற்றதெல்லாம் சலனமில்லாமல் இருக்கிறது என்றால்தான் இந்த ஒருத்தன் தன் இஷ்டப்படி ஸுமூகமாக ஸஞ்சாரம் பண்ண முடியும். (எல்லா தினுஸு ஸஞ்சாரங்களையும்தான் சொல்கிறேன்.) ஆனால் வாஸ்தவத்தில் அப்படியா இருக்கிறது? அத்தனை ஜீவராசிகளுக்கும்தான் ஓயாத சலனமாக இருக்கிறது. அசேதன வஸ்துகளிலுங்கூட ஒரே சலனம்! ஒரு அணுவுக்குள்ளே எலெக்ட்ரிஸிடியின் வேகத்தோடு ஸதா ஸஞ்சாரம் நடந்துகொண்டே இருக்கிறது. இப்படிப் பல உயிர்களும், ஜட வஸ்துக்களும் ஒரே ஸமயத்தில் ஸஞ்சரித்துக் கொண்டிருந்தால் அவற்றுக்கிடையே மோதல்களும் உண்டானபடிதானே இருக்கும்.

ஓ பக்கங்கள் - அரசியல் முதல் பாலியல் குற்றம் வரை மக்கள் கருத்து ! ஞாநி

 

மக்களிடம் பல்வேறு சமூக, அரசியல் விஷயங்கள் பற்றிக் கருத்துக் கேட்பதை பத்திரிகைகள், ஊடகங்கள் தொடர்ந்து செய்து வருகின்றன. நான் பங்கேற்கும் சென்னைப் புத்தகக் காட்சியில் ஒவ்வோர் ஆண்டும் என் ‘ஞானபாநு’ அரங்கில் இப்படி தினசரி தேர்தலை நடத்தி வருகிறேன். மக்கள் வாக்களிப்பதற்கு வோட்டுப் பானைகள் வைத்திருப்போம். குடவோலைகளில் தெரிய வரும் முடிவுகள் மறுநாள் அரங்கில் வெளியிடப்படும்.

 

இந்த வருடமும் அப்படி கேட்ட சில கேள்விகளும், மக்கள் அளித்த முடிவுகளும் இதோ :

தமிழகத்தில் தி.மு.க., அ.தி.மு.க. இரு கட்சிகளுக்கும் மாற்றாக யாரை ஆதரிப்பீர்கள்?

1. ம.தி.மு.க - 35%
2. பா.ம.க. - 7%
3. இடதுசாரிகள் - 19%
4. வேறு யாரேனும் - 29%.

இந்த வேறு யாரேனும் என்பதில் சிலர் காங்கிரஸ், பி.ஜே.பி., ஆம் ஆத்மி, தே.மு.தி.க. என்றெல்லாம் கூட எழுதினார்கள். தே.மு.தி.க.வுடன் கூட்டணி வைக்க பல கட்சிகள் விரும்பும்போது அவர்களுக்குத் தனிப்பானை வைத்திருக்கக்கூடாதா என்று ஒருவர் கேட்டார்.

மக்களவைத் தேர்தல்: மத்தியில் எந்தக் கட்சி ஆட்சிக்கு வரவேண்டுமென்று விரும்புகிறீர்கள்?

1. காங்கிரஸ் - 12%
2. பி.ஜே.பி - 56%
3. ஆம் ஆத்மி - 26%
4. மூவரும் கூடாது - 6%.

இந்த முடிவுகளில் காங்கிரஸ் பெருவாரியாக நிராகரிக்கப்படுவது ஒரு வியப்பான செய்தி அல்ல. பொதுவாக, படித்தவர்கள் மத்தியில் பி.ஜே.பி.க்கு நரேந்திர மோடியை முன்னிறுத்தியதால் மிகப்பெரும் ஆதரவு வந்துவிட்டது என்று சொல்லப்படும் நிலையில், பி.ஜே.பி.க்குக் கிடைத்திருப்பது 56 சதவிகிதம்தான். பி.ஜே.பி. கூடாது என்று கருதும் படித்தவர்கள் 44 சதவிகிதம் என்பது கணிசமான எண்ணிக்கை. அப்படியானால் படிக்காதவர்கள் மத்தியில் பி.ஜே.பி.யின் நிலை என்னவாக இருக்கும் என்று யூகிக்கலாம்.

இரண்டாவது செய்தி, தமிழ்நாட்டில் எந்தச் சலனத்தையும் ஏற்படுத்தும் எந்த வேலையையும் இதுவரை செய்யாத ஆம் ஆத்மி கட்சிக்கு 26 சதவிகிதம் ஆதரவு இருப்பதாகும். ‘ஆம் ஆத்மி’ தொடர்பாக இன்னொரு கேள்வியும் கேட்டிருந்தோம்.

ஆம் ஆத்மி கட்சி தமிழகத்தில் தழைக்கமுடியுமா?

1. கேஜரிவால் போல இளைஞர்களை ஈர்க்கும் பலமான தலைமை இருந்தால் தழைக்கும். - 55%

2. ஹிந்தி பெயரை மாற்றாமல் சரியான தலைமை இருந்தாலும் தழைக்காது. - 5%

3. என்ன செய்தாலும் இங்கே இருக்கும் அரசியல் கலாசாரத்தில் அது வளரமுடியாது. - 40%.

இந்த முடிவுகள் சுவாரஸ்யமானவை. காரணம் ஹிந்திப் பெயரே இருந்தாலும் கூட சரியான தலைமை இருந்தால் தழைக்கும் என்பவர்கள் 55%.

ஆனால் தமிழக அரசியல் கலாசாரத்துக்கும் ஆம் ஆத்மி கலாசாரத்துக்கும் பொருந்தி வராது என்று நினைப்பவர்கள் 40 சதவிகிதம்.

படித்தவர்கள் மத்தியில் தமிழக அரசியல் சூழல் பற்றி ஒரு விரக்தி மனப்பான்மை கடுமையாக இருப்பதையே இது காட்டுகிறது.

தமிழக மீனவர்கள் நூற்றுக்கணக்கில் இலங்கைப் படைகளால் கொல்லப்பட்டும் சிறைபிடிக்கப்பட்டும் வந்திருக்கும் மோசமான வரலாற்றுச் சூழலில், அரசியலுக்கு அப்பால், இந்தப் பிரச்னையின் வேருக்குப் போய் தீர்வு காண்பது அவசியம் என்பதால் ஒரு கேள்வி கேட்டோம்.

தமிழக மீனவர் இலங்கைக் கடலில் அத்து மீறுவதால் இலங்கைப் படைகளால் வதைக்கப்படும் பிரச்னைக்குத் தொலை நோக்குத் தீர்வு என்ன?
1. நம் கடலில் மீன் வளத்தைக் குறைக்கும் ராட்சத மீன்பிடி கப்பல்கள் தடை செய்யப்படவேண்டும் - 61%

2. இலங்கைக் கடலை இந்திய அரசு குத்தகைக்கு எடுத்து நம் மீனவர்கள் பயன்படுத்தத் தரவேண்டும் - 30%

3. நம் மீனவர்களுக்கு நவீன கல்வி அளித்து மாற்று வேலைவாய்ப்புகளை ஏற்படுத்த வேண்டும் - 9%.

இதில் இரண்டாவது, மூன்றாவது தீர்வுகளைப் பல அறிஞர்கள் சொல்லி வந்திருக்கிறார்கள். ராட்சத மீன்பிடி கப்பல்களைத் தடைசெய்வதையே பெருவாரியான மக்கள் ஆதரித்திருக்கிறார்கள்.

புத்தகக் காட்சி நடைபெற்ற சமயத்தில் அரசியலில் பெரும் கவனத்தை எழுப்பிய தமிழ்நாட்டு நிகழ்வு தி.மு.க.வின் மு.க.அழகிரி அளித்த தொலைக்காட்சிப் பேட்டியாகும். இந்த நிலையில் வைத்த கேள்வி இது...

தி.மு.க.வில் மு.க. அழகிரி எழுப்பும் எதிர்ப்பு:

1. வலுவடைந்து கட்சியையே உடைக்கும் - 21%

2. என்ன செய்தாலும் ஸ்டாலின் தலைமையில் கட்சி வருவதைத் தடுக்க முடியாது - 79%.

இந்தப் பதில் அழகிரியைத் தவிர வேறு யாருக்கும் ஆச்சரியமாக இருக்காது.

சென்ற வருடம் இந்திய மக்களின் கவனத்தை ஈர்த்த முக்கியமான நிகழ்வுகளில் பாலியல் குற்றங்கள் குறிப்பிடத்தக்கவை.

நீதிபதிகள், முன்னாள் நீதிபதிகள் மீதான குற்றங்களை விசாரிக்கத் தனி அமைப்புத் தேவை என்கிறது உச்ச நீதிமன்றம்:

1. சரியான கருத்து. உடனே தனி அமைப்பை அரசு உருவாக்கவேண்டும் - 40%

2. தவறான கருத்து. எல்லா குடிமக்களையும் போலவே அவர்களும் விசாரிக்கப்படவேண்டும் - 60%

பாலியல் குற்றங்கள், நம் சமூகத்தில் வயது, சாதி, மத, வர்க்க, இன வேறுபாடின்றி நடப்பது பற்றி நாம் மிகமிகக் கவலைப்பட வேண்டும். காரைக்கால் கொடூரம் எல்லா அரசியல் கட்சிகளையும் அம்பலப்படுத்தியிருக்கிறது. எல்லா பாலியல் குற்றங்களுக்கும் அடிப்படை, ஆண்- பெண் உறவு பரஸ்பர மதிப்புடனும் சமத்துவத்துடனும் இருக்க வேண்டுமென்ற அறிவு வளராததுதான். ஆனால் ஊடக விவாதங்களில் என்னென்னவோ காரணங்கள் சொல்லப்படும், விவாதிக்கப்படும். இது பற்றிக் கேள்வி எழுப்பினோம்.

பாலியல் குற்றங்கள் பெருகுவதற்கு முக்கிய காரணம்...

1. பெண்களின் உடை, நடத்தை - 19%

2. மீடியா, சினிமாவின் காமக் கலாசாரம் - 26%

3. ஆண்களைச் சரியாக வளர்க்கத் தெரியாத குடும்ப அமைப்பு - 55%.

இந்தப் பதில்களில் எனக்குக் கிடைத்த முக்கியமான செய்தி, நம் படித்த வர்க்கம் கொஞ்சமேனும் குடும்ப அமைப்புப் பற்றி ஒரு சுயவிமர்சனப் பார்வையை இப்போது பெறத் தொடங்கியிருக்கிறது என்பதுதான்.

ஊடகங்களில் சர்ச்சையில் அடிபட்ட இன்னொரு விஷயம் ஆம் ஆத்மி கட்சித் தலைவரான வழக்கறிஞர் பிரஷாந்த் பூஷண் காஷ்மீரில் ரெஃபரெண்டம் தேவை என்று சொன்னது பற்றியாகும்.

காஷ்மீர் இந்தியாவுடன் இருக்கலாமா, கூடாதா என்று காஷ்மீர் மக்களிடம் வாக்கெடுப்பு எடுக்கச் சொல்வது...

1. சரி. 1947ல் செய்யாததை இப்போதாவது செய்ய வேண்டும் - 45%

2. தவறு. வடகிழக்கு போன்ற மீதி மாநிலங்களிலும் இதே போல செய்யவேண்டிய ஆபத்து ஏற்படும் - 43%

3. காஷ்மீருக்கு மட்டும் வாக்கெடுப்பு சரி. மீதி மாநிலங்களுக்கு அனுமதிக்கக்கூடாது - 12%.

இந்தப் பதில்கள் காஷ்மீர் பற்றி உணர்ச்சிவசப்படாமல் கருத்து சொல்வோர் எண்ணிக்கை அதிகரித்திருப்பதையே எனக்குக் காட்டுகிறது.

உணர்ச்சியைத் தூண்டும் இன்னொரு விஷயம் ஜல்லிக்கட்டு. மக்கள் கருத்து என்ன?

1. மனிதரும் விலங்குகளும் வீரம் என்ற பெயரால் சாவதாலும் சாதி மோதல்களுக்கு வழிவகுப்பதாலும் தடைசெய்யப்படவேண்டும். - 53%

2. பண்பாட்டு, மரபு என்பதால் கடும் விதிமுறைகளுடன் ஒழுங்குபடுத்தப்பட்டு அனுமதிக்க வேண்டும்.- 47%

3. எது சரி என்று குழப்பமாக இருக்கிறது.- 0%.

மூன்றாவது பதில்தான் முக்கியமானது. யாருக்கும் இதில் எந்தக் குழப்பமும் இல்லை. தங்கள் நிலையில் தெளிவாகவே இருக்கிறார்கள். ஏறத்தாழ சரி பாதியாக எதிரெதிர் கருத்துக்கும் ஆதரவு இருக்கிறது.

என்னைப் பொறுத்தவரையில் இன்றைய தமிழகத்தின் முதல் முக்கியமான பிரச்னை மதுதான். சுமார் ஒரு கோடி பேர் தினசரி மது குடிக்கும் தமிழகத்தில் மக்கள் கருத்து என்ன? இதோ எங்கள் கேள்வியும் பதிலும்.

தமிழகத்தில் மதுக் கடைகள்:

1. மார்ச் 31னுடன் மூடி பூரண மதுவிலக்கை ஏற்படுத்த வேண்டும் - 38%.

2. படிப்படியாகக் குறைத்துவந்து ஓராண்டுக்குள் முழுக்க மூடவேண்டும்.- 52%

3. நல்ல வருமானம் கிடைப்பதால் தொடர்ந்து நடத்தலாம். - 10%.

எப்படிப் பார்த்தாலும் 90 சதவிகிதம் பேர் மதுக் கடைகள் மூடப்பட வேண்டுமென்றே நினைக்கிறார்கள். இது எனக்கு மிக ஆரோக்கியமான நிலையாகத் தோன்றுகிறது.

இந்த வருடக் கருத்துக் கணிப்பில் கிடைத்த முடிவுகள் எனக்கு நம் சமூகம் பற்றிய நம்பிக்கையை அதிகரிக்கின்றன. இந்தப் புத்தகக் காட்சியில் மூன்று விஷயங்கள் எனக்கு முக்கியமாக நடந்தன. ஒரு கோவில் சுவரில் ‘இங்கே லுங்கி, நைட்டி அணிந்து வரக்கூடாது’ என்று போட்டிருந்ததை நான் ஃபேஸ்புக்கில் விமர்சித்திருந்தேன். லுங்கி என்பது மதம் சார்ந்த உடை அல்ல. ஏழைகளின் உடை.  என் கருத்தை ஆட்சேபித்த சிலர் ‘நான் புத்தகக் காட்சிக்கு லுங்கி அணிந்து வருவேனா?’ என்று சவால் எழுப்பினார்கள். இந்தச் சவால் விடுத்தவரையே லுங்கி வாங்கிப் பரிசளிக்கும்படி கேட்டேன். கொண்டுவந்து கொடுத்தார். அதில் புத்தகக் காட்சிக்குச் சென்று என் நூல் வெளியிட்டு நிகழ்வில் பங்கேற்றது ஒரு மகிழ்ச்சி.இரண்டாவது மகிழ்ச்சி, வேறு சில எழுத்தாளர்கள் முயற்சிக்கத் தொடங்கியிருப்பது போல நானும் என் நூலை வெளிவரும் முன்னரே ஏலத்தில் எடுக்கும்படி வேண்டுகோள் விட்டதற்குக் கிடைத்த வரவேற்பாகும். என் ‘ஆப்பிள் தேசம்’ நூலை அதிகத் தொகைக்கு ஏலம் எடுக்க ஃபேஸ்புக் மூலம் மட்டும் 17 பேர் வந்தனர். மொத்தமாக சுமார் 30 ஆயிரம் ரூபாய் கிடைக்கும். இதில் மூன்றில் ஒரு பங்கு எழுத்தாளராகிய எனக்கு. இன்னொரு பங்கு பதிப்பாளருக்கு. மூன்றாவது பங்கு, சென்னை மாநகராட்சிப் பள்ளிகளின் ஏழை மாணவர்கள் படிக்க, பாடமல்லாத நூல்களை வாங்கித் தருவதற்கு.மூன்றாவது மகிழ்ச்சி, நான் ஆரம்பம் முதல் 37 வருடங்களாகத் தவறாமல் பங்கேற்கும் சென்னைப் புத்தகக் காட்சியின் தொடக்க விழா மேடையில் அறிவிப்பின் மூலம் நான் வரைந்த பாரதி ஓவியத்தை நாட்டுடைமையாக்கியதாகும். அந்த வகையில் 31 வருடங்கள் முன்னர் நான் வரைந்த பாரதி ஓவியத்தை, இப்போது எனக்கு 60 வயது நிறைந்ததையொட்டி சமூகத்துக்குப் பயனுள்ள விதத்தில் கொண்டாடுவதற்காக, நாட்டுடைமையாக்கி அறிவித்தேன். தனிப்பட்ட உடல்நிலை, சமூகத்தின் அரசியல், பொருளாதார, பண்பாட்டுச் சூழ்நிலை எல்லாம் கவலைக்குரியதாக இருக்கும் சமயங்களில் இப்படிச் சில சின்னச் சின்ன மகிழ்ச்சிகளுடன் நம்மை நாமே உற்சாகப்படுத்திக் கொண்டு வாழ வேண்டியிருக்கிறது.

 




 


 

குங்குமம்

திருவாரூரை அடுத்த சாத்தனூர் கிராமத்தைச் சேர்ந்தவர் வேங்கட சுப்பிரமணியம். வேத விற்பன்னர். மகாபெரியவர் சன்னிதானத்தில் முதல் பக்தர். ஒரு முறை மகாபெரியவர் மயிலை கபாலீஸ்வரர் கோயிலுக்கு விஜயம் செய்தார். கற்பகாம்பாள் சன்னிதியில் கொடுக்கப்பட்ட குங்குமப் பிரசாதத்தைப் பார்த்ததும், அந்தக் குங்குமம் சுத்தமான தயாரிப்பாக இருக்க முடியாது என்று அவருக்குத் தோன்றியது. தூரத்தே கோஷ்டியில் நின்றுகொண்டிருந்த வேங்கட சுப்பிரமணியத்தை அருகில் வரும்படி கட்டளையிட்டார். ஓடோடி வந்து பவ்யமாக குனிந்தபடி நின்றார் அவர். உனக்கொரு வேலை கொடுக்கப் போறேன். செய்வியா?" என்றார். உத்தரவு" என்றார் வேங்கட சுப்பிரமணியம். தமிழ்நாட்டில் பல கோயில்களில் அம்பாள் சன்னிதியில் கொடுக்கப்படும் குங்குமம் அசலான தயாரிப்பாக இல்லை. எனவே, பக்தர்களுக்காக நீ சாஸ்திரோக்தமாக குங்குமம் தயாரிக்க வேண்டும்" என்று ஆக்ஞையிட்டார் மகாபெரியவர்.

மகாபெரியவர் கட்டளையிட்டவுடன் சும்மா இருக்க முடியுமா? வேதங்கள், உபநிஷத்துக்கள், அம்பாளின் மகத்துவத்தை விளக்கும் ஸ்தோத்திரங்கள் ஆகியவற்றில் குங்குமத்தின் பெருமைகளைக் குறித்த தகவல்களைச் சேகரித்தார். குங்குமம் தயாரிப்பு தொடர்பான புத்தகங்களைத் தேடிக் கண்டுபிடித்தார். பின் தயாரிப்பைத் துவக்கினார். நல்ல தரமான குண்டு மஞ்சள், எலுமிச்சை, படிகாரம், வெண்காரம், நல்லெண்ணெய் ஆகியவைதான் குங்குமத் தயாரிப்புக்கான மூலப் பொருட்கள். பழந்தயாரிப்புப்படி கைகளாலேயே தயாரிக்கப்பட்ட குங்குமத்தைச் செய்து முடித்ததும் வேங்கட சுப்பிரமணியத்துக்கு மகிழ்ச்சி பிடிபடவில்லை. தயாரித்த குங்குமத்தை ஒரு துணிப்பையில் போட்டு எடுத்துக்கொண்டு மகாபெரியவரைப் பார்க்க கும்பகோணம் விரைந்தார். குங்குமத்தை உள்ளங்கையில் இட்டுப் பார்த்தவுடன் மகாபெரியவரின் முகத்தில் மலர்ச்சி தெரிந்தது. இந்தப் பணியை நீ தொடர வேண்டும்" என்று சைகையிலேயே ஆணையிட்டார். வேங்கட சுப்பிர மணியம் ஸ்ரீவித்யா உபாசகர். அம்பாள் குங்குமப் பிரியை ஆயிற்றே! ஒரு அர்ப்பணிப்போடு குங்குமத் தயாரிப்பில் இறங்கிவிட்டார் வேங்கட சுப்பிரமணியம்.

ஸ குங்கும விலேபனாம் அளிக சும்பி கஸ்தூரிகாம்
ஸமந்த ஹஸிதேக்ஷணாம் ஸ ஸரஸாப பாசாங்குசாம்
அசேஷஜ நமோஹினீம் அருணமால்ய பூஷாம்பராம்
ஜபாகுஸூம பாசுராம் ஜப விதௌ ஸ்மரேத் அம்பிகாம்என்று லலிதா சகஸ்ரநாமத்தில் சொல்லப்பட்டிருக்கிறது.

அதாவது குங்குமப் பூவின் விழுதைப் பூசிக் கொண்டிருப்பவளும், நெற்றியை அலங்கரிக்கும் கஸ்தூரி திலகம் இட்டவளும், புன்னகைக்கும் கண்கள் உள்ளவளும், வில், அம்பு, பாசம், அங்குசம் ஏந்தியவளும், எல்லா மக்களையும் தன்பால் ஈர்ப்பவளும், செந்நிற மாலை, ஆடைகள் அணிந்து, செம்பருத்திப் பூ போல ஒளிமயமாக இருப்பவளுமான அம்பிகையை ஜபகாலத்தில் நினைவு கொள்கிறேன் என்பதுதான் இதன் பொருள்.  அம்பாள் உமைக்கு பல அம்சங்கள். திரிபுரசுந்தரி, காமாட்சி, அபிராமி, பார்வதி, லலிதா என்று பல திருநாமங்கள். ஒவ்வொரு அம்சத்திலும், பல பாக்கியங்களை பக்தர்களுக்கு அள்ளித் தருகிறாள் அம்பாள். எப்போதும் சுமங்கலியாகவே இருப்பவள் லலிதா" என்று லலிதா சகஸ்ரநாமத்தில் சொல்லப்பட்டிருக்கிறது. சுமங்கலியான பெண்ணை பளிச்சென்று வெளிப்படுத்துவது, அவளது நெற்றியில் அலங்கரிக்கும் குங்குமம்தான். ஒரு பெண் தன் திருமணத்தின் போதுதான் குங்குமம் வைத்துக் கொள்ளும் தகுதியைப் பெறுகிறாள். நெற்றியிலுள்ள குங்குமம், ஒரு பெண்ணின் சுமங்கலித் தன்மையை மட்டும் சொல்வதல்ல. அவளுக்குள் பொதிந்திருக்கும் ஞானத்தையும், ஆற்றலையும் குறியீடாக உணர்த்தும் தன்மையும் கொண்டது. சௌந்தர்ய லஹரியும் லலிதா சகஸ்ரநாமமும் குங்குமத்தின் பெருமைகளை எடுத்து வைக்கின்றன.

சுமார் 5,000 வருடங்களாக, குங்குமம் வைத்துக் கொள்வது என்பது நமது சம்பிரதாயமாக இருந்து வருகிறது என்கிறது ஒரு புராணத் தகவல். இரண்டு இமைகளுக்கு நடுவில் நெற்றிப் பொட்டில் குங்குமம் வைத்துக் கொள்வதற்குப் பல காரணங்கள் உண்டு. நமது உடலில் ஆற்றலை வெளிப்படுத்தும் வகையில் ஏழு சக்கரங்கள் உள்ளன. நமது செயல்கள், சாதனைகள், சாகசங்கள் என்று அனைத்துக்குமே காரணமாக அமைந்தவை இந்தச் சக்கரங்கள். இந்தச் சக்கரங்களின் செயல்பாட்டைத் தூண்டி விடுவதில், முதுகுத் தண்டுக்கு அடிப்பகுதியில் பொக்கிஷமாக இருக்கும் குண்டலினி சக்திக்கு பெரும்பங்கு உண்டு. யோகம், தியானம் போன்றவற்றின் மூலம் குண்டலினி சக்தியை எழுப்பி, இந்த ஏழு சக்கரங்களைத் தூண்டி விடலாம். இந்த ஏழு சக்கரங்களில் ஒன்றான ஆக்ஞை, நெற்றிப்பொட்டில், புருவங்களின் மத்தியில்தான் உள்ளது. ஒருவரின் ஞானம், பேரறிவு ஆகியவை வெளிப்பட காரணமாக அமைவது இந்த ஆக்ஞா சக்கரம் தான். அதைக் குறித்துத்தான் நெற்றிப்பொட்டில் குங்குமம் வைக்கிறோம்.  

கங்கையில் மூழ்கினால் பாவம் தொலையுமா?

காசி யாத்திரைக்குப் புறப்பட்ட ஒருவன் ஸ்ரீராமகிருஷ்ண பரமஹம்சரைச் சந்தித்து ஆசி பெற வந்தான். கங்கை அங்கிருந்து இங்கு வந்திருக்கிறாளே, நீ ஏன் இங்கேயே ஸ்நானம் செய்யக் கூடாது?" என்று கேட்டார் பரமஹம்சர்.

அதற்கு அவன், சுவாமி! கங்கையில் விசேஷ சக்திகள் உள்ளனவாம். எப்படிப்பட்ட பாவியானாலும் ஒருமுறை கங்கையில் முழுகினாலே பாவங்கள் அனைத்தும் தொலைந்து அவனுக்கு ஸ்வர்க்கவாசம் கிட்டுமாம்" என்றான்.ஸ்ரீராமகிருஷ்ணர், நீ இதற்கு முன்பு காசிக்குப் போயிருக்கிறாயா? கங்கைக் கரையிலுள்ள பெரிய பெரிய மரங்களைப் பார்த்திருப்பாயே?" என்று கேட்டார். சிறு வயதில் என் தந்தையுடன் போயிருக்கிறேன். அப்பொழுது மரங்களைப் பார்த்த ஞாபகம் இலேசாக இருக்கிறது" என்றான் யாத்திரிகன்.ஸ்ரீராமகிருஷ்ணர் இப்போது வாய்விட்டே சிரிக்க ஆரம்பித்தார் அந்த மரங்களில்தான் ரகசியம் அடங்கி இருக்கிறது! கங்கையில் ஸ்நானம் செய்பவர்கள் முதலில் தம் சட்டைகளைக் கழற்றி வைக்கின்றனர். அப்பொழுது அவர்களுக்குள் இருக்கும் பாவங்களுக்கு கங்கையின் ஸ்பரிசத்தினால் நாம் நாசமடைவோம் என்கிற பயம் உண்டாகிறது. அவை பறந்து சென்று மரங்களின் மேல் அமர்ந்து கொள்கின்றன. அங்கு தம் எஜமானவர்கள் திரும்பி வருவதை எதிர்நோக்கிக் காத்திருக்கின்றன. அவர்கள் ஸ்நானம் செய்து மேலே வந்த உடனே மரத்தில் காத்திருந்த பாவங்கள் அவர்களைப் பிடித்துக் கொள்கின்றன. இந்த விஷயத்தை யாரும் சொன்னதில்லை; சொல்லவும் போவதில்லை. ஏனெனில் அப்போது காசி பண்டிதர்களின் வருமானம் குறைந்துவிடுமே. அதனால் நீ ரொம்ப ஜாக்கிரதையாக இருக்க வேண்டும்!" என்றார்.யாத்திரிகனுக்குப் பயம் ஒரு பக்கம், தான் வெகுவாகக் கௌரவிக்கும் துறவி பொய் சொல்லமாட்டார் என்ற நம்பிக்கை ஒரு பக்கம். காசிக்குப் போயும் பாவம் தொலையாவிட்டால் இவ்வளவு கஷ்டமான யாத்திரையை ஏன் மேற்கொள்ள வேண்டும் என்கிற பகுத்தறிவு ஒரு பக்கம்.அவனுக்கு இன்னொரு யோசனை வந்தது. சுவாமி! தாங்கள் சொல்வது சரியென்றே வைத்துக் கொள்ளலாம். காசியில் இறந்தால் அல்லது அங்கு அந்திம சம்ஸ்காரம் நடந்தால் அந்த ஆத்மா ஸ்வர்க்கத்திற்குப் போவதாகச் சொல்லப்படுகிறதே. அவர்கள் செய்த பாவங்கள் எங்கு போகின்றன?" என்று பணிவாகக் கேட்டான்.இந்தப் பாவங்களும் அதேபோல் தான். இறந்தவனுடைய உடலை, கங்கைக் கரைக்குக் கொண்டு வந்ததுமே அவனது பாவங்கள் மரத்தில் ஏறிவிடுகின்றன. ஆனால், அவற்றிற்குத் திரும்பி வருவதற்கு உடல் அங்கு இருப்பதில்லை. வேறு வழியின்றி அவை வேறு உடல் தேடி அம்மரங்களிலேயே காத்துக் கொண்டிருக்கின்றன.தினமும் உன்னைப் போன்ற பல ஆயிரம் மக்கள் கங்கையில் ஸ்நானம் செய்ய வருவார்களல்லவா? அவர்களில் யாரையாவது தேர்ந்தெடுத்து. அவனுக்குள் புகுந்து விடுகின்றன. அவனுக்குத் தன்னுடைய பாவங்களுடன் அதிகப் படியாகப் பாவங்கள் சேருகின்றன. இதொன்றையும் அறியாமல் அவன் காசி யாத்திரை செய்த திருப்தி, மகிழ்ச்சியுடன் தன்னையறியாமல் இந்தப் பாவங்களையும் சுமந்து கொண்டு திரும்புகிறான்" என்று விளக்கினார்.

அப்படியானால் என் பாவங்களைப் போக்குவது எப்படி?" என்று கேட்டான். பரமஹம்சர் சாந்தமாக, எல்லாவற்றையும் பவதாரிணிக்கு அர்ப்பித்துவிடு. ‘இனி பாவம் செய்யாமல் காப்பாற்று. முந்தைய பாவங்களின் பலனைத் திடமனதுடன் துக்கப்படாமல் அனுபவிக்கும் மனநிலையை எனக்குக் கொடு’ என்று கேள். அவளே காசி, அவளே கங்கை" என்று உணர்ச்சிப் பெருக்குடன் உபதேசித்தார்.யாத்திரிகன் தெளிந்த மனத்துடன் திரும்பினான்.

ஏழுக்கு இத்தனை பெருமைகளா?

இயற்கையில், ஆண்டவனின் படைப்புகள் பொதுவாக ஏழு ஏழாக இருப்பதையே கண்கூடாகப் பார்க்கிறோம். இந்த 'சப்தம’ என்று சொல்லப்படும் ஏழு என்ற எண் உரு தெய்வாம்சம் பொருந்தியதாகக் கருதப்படுகிறது.

முதல் படைப்புகளான ஏழு கிரகங்கள் சூரியன், சந்திரன், செவ்வாய், புதன், குரு, சுக்கிரன், சனி ஆகியவை தங்கள் நீள்வட்டப் பாதையில் மிகவும் துல்லியமாக ஒரு நொடிகூடத் தவறாமல் காலம் காலமாக சுற்றிச் சுழல்கின்றன.உலகின் எல்லா நாடுகளிலும், இந்த ஏழு கிரகங்களை ஒட்டியே வாரத்துக்கு 7 நாட்கள் ஞாயிறு, திங்கள், செவ்வாய், புதன், வியாழன், வெள்ளி, சனி என்று முறையாக வகுக்கப்பட்டிருக்கின்றன.இயற்கைப் பிறப்புகள் தேவர், மனிதர், விலங்கு, பறவை, ஊர்வன, நீரில் வாழ்வன, தாவரம் என ஏழாக அமைந்துள்ளன.இயற்கை வண்ணங்கள் ஊதா, கருநீலம், நீலம், பச்சை, மஞ்சள், ஆரஞ்சு, சிவப்பு என ஏழு. வானவில்லில் காட்சி தருகிற ஏழு நிறங்கள் இவை.இசையில், ச-ரி-க-ம-ப-த-நி என சப்த ஸ்வரங்கள் அமைந்துள்ளன.

அது மட்டுமா... அயோத்தி, காசி, மாயா, உஜ்ஜயினி (அவந்தி), துவாரகா, மதுரா, காஞ்சி ஆகிய ஏழு நகரங்களில் வசிப்பதும், கங்கை, யமுனை, சரஸ்வதி, நர்மதை, கோதாவரி, கிருஷ்ணா, காவிரி ஆகிய ஏழு நதிகளில் நீராடுவதும் புண்ணியம் நிறைந்தவை எனப் போற்றப்படுகின்றன.

சப்தரிஷிகள் என அத்ரி, பிருகு, குத்ஸர், வசிஷ்டர், கௌதமர், காச்யபர், ஆங்கீரஸர்  ஆகியோரைக் கொண்டாடுகிறார்கள். சப்த சிரஞ்ஜீவிகளாக அஸ்வத்தாமர், மகாபலி, ஆஞ்சநேயர், வியாசர், விபீஷணர், கிருபர், பரசுராமர் ஆகிய ஏழு பேரையும் அவர்களுக்கு உரிய நாளில், வணங்கி வழிபடுகிறோம்.

மெடிக்ளைம்: சந்தேகமும் தீர்வும்...

'நான் ஏன் மெடிக்கல் இன்சூரன்ஸ் எடுக்கணும்? தேவை இல்லாமல் இன்சூரன்ஸ் கம்பெனிக்காரனுக்கு ஏன் பணத்தைக் கொடுக்கணும்?' என்ற நண்பர் ஒருவர், அலுவலகத்தின் கட்டாயம் காரணமாக மெடிக்ளைம் பாலிசியை எடுத்தார். இன்சூரன்ஸ் எடுத்த ஒன்றரை மாதத்தில், விபத்தில் சிக்கி மருத்துவமனைக்குக் கொண்டுசெல்லப்பட்டார். ஹெல்மெட் அணிந்திருந்ததால் உயிருக்கு ஆபத்து இல்லை. இருப்பினும், மிகப் பெரிய காயங்கள் காரணமாக மருத்துவமனையில் தீவிர சிகிச்சைப்பிரிவில் சேர்க்கப்பட்டார். மருத்துவக் காப்பீடு இருந்ததால், மருத்துவச் செலவின்றி அவர் வீடு திரும்பினார்.

'ஆரோக்கியமற்ற வாழ்க்கைமுறையும், அதனால் ஏற்படும் உடல்நலக்குறைவும் மருத்துவச் செலவுகளை அதிகரிக்கின்றன. இத்தகைய சூழலில், மருத்துவக் காப்பீடு என்பது தவிர்க்க முடியாதது. மருத்துவச் செலவு என்பது எல்லோராலும் ஈடுகட்ட முடியாத ஒன்று. அதனால்தான் மக்களும் ஏதேனும் ஒரு மருத்துவக் காப்பீட்டுத் திட்டத்தில் தங்களை இணைத்துக்கொள்கிறார்கள்.'- ஃபார்ச்சூன் பிளானர் நிறுவனரும், நிதி ஆலோசகருமான பி.பத்மநாபன்.

ஏன் எடுக்க வேண்டும் காப்பீடு?

எல்லோரும் ஆரோக்கியமாக இருக்க வேண்டும் என்பதுதான் நம் விருப்பம். ஒருவேளை, எதிர்பாராத நேரத்தில் திடீர் விபத்துகள் ஏற்பட்டால், நோய்கள் தாக்கினால், அதை எப்படி எதிர்கொள்வது? அதற்குத் தீர்வாக இருப்பதுதான் மருத்துவக் காப்பீடு. எளிதாகச் சொல்லப்போனால், நமக்கு எதிர்காலத்தில் ஏதேனும் நோய்கள் வரலாம் அல்லது மருத்துவ சிகிச்சை தேவைப்படலாம் என்று நினைத்தால், குறைந்த அளவு பிரீமியத்தைக் காப்பீட்டு நிறுவனங்களுக்குச் செலுத்தி, அதனால் ஏற்படும் செலவுகளை, காப்பீட்டு நிறுவனம் மூலம் பெறக்கூடிய திட்டமே மருத்துவக் காப்பீடு. 

தனிநபர் மற்றும் ஃப்ளோட்டர் பாலிசி!

நல்ல உடல் ஆரோக்கியத்துடன் இருப்பவர்கள், 'நான் ஏன் மருத்துவக் காப்பீட்டுத் திட்டத்தினைத் தேர்ந்தெடுக்க வேண்டும்’ என்று நினைக்கலாம். ஆனால், ஃபேமிலி ஃப்ளோட்டர் என்ற பாலிசித் திட்டம் மூலம் குடும்பத்தில் உள்ள அனைவரையும் காப்பீட்டுப் பயன்பாட்டுக்குள் கொண்டுவரலாம். தனிநபர் பாலிசியும் உள்ளது. இது அவ்வளவு பிரபலம் இல்லை. ஒருவர் திருமணம் ஆவதற்கு முன்பு, தனிநபர் பாலிசி எடுக்கலாம். பின்பு திருமணம் ஆன பின்பு மனைவி மற்றும் குழந்தைகளையும் அதில் இணைத்துக்கொள்ள முடியும். தனித்தனியாக எடுப்பதைவிட, ஃப்ளோட்டர் பாலிசி பிரீமியம் குறைவு. 

நம்மைப் பற்றிய விவரங்கள்!  

க்ளைம் எளிதாக இருக்க வேண்டுமானால், நாம் நம்முடைய உடல் சம்பந்தப்பட்டவற்றை ஒன்றும் மறைக்காமல் சொல்ல வேண்டும். முகவரிடம் நம் சந்தேகங்கள் தீர்ந்த பிறகே பாலிசி போட சம்மதம் கொடுக்க வேண்டும். முக்கியமாக நம் வயது, ஏதாவது வியாதி இருக்கிறதா, இல்லையா என்று முன்கூட்டியே மருத்துவப் பரிசோதனை செய்து, அதனை விண்ணப்பத்துடன் இணைத்துப் பதிவுசெய்திருக்க வேண்டியது அவசியம்.

காப்பீட்டைக்  கண்டறிவோம்!  

மிகப் பெரிய சவால்... 'எந்த பாலிசி எடுப்பது, எவ்வளவு எடுப்பது, மேலும் எந்த நிறுவனத்தில் எடுப்பது, நமக்கு எது தேவை’ என்பதை நாம் அறிய வேண்டும், பிறகு சில கேள்விகளை இரண்டு, மூன்று நிறுவனங்களில் கேட்பதன் மூலம் நமக்கு ஓரளவு தெளிவு கிடைக்கும். இன்று இணையதளங்களில் நாம் எதைக் கேட்டாலும் நமக்கு விடைகிடைக்கும். அதிலும் ஒருமுறை நாம் தேர்வுசெய்தது சரியாக உள்ளதா என்று பார்க்க முடியும். 'காசுக்கேத்த தோசை’ என்பார்கள், அதுபோல பிரீமியத்தை மட்டும் பார்க்காமல், அதில் என்னென்ன கவர் செய்கிறார்கள்... அதில் ஏதாவது கண்டிஷன் இருக்கிறதா... என்று பார்த்தால், நம்மால் நல்ல ஒரு காப்பீட்டைக் கண்டுபிடிக்க முடியும். 

பொதுவான தவறு!  

இன்று நிறையப் பேர், 'எனக்கு அலுவலகத்தில் காப்பீடு உள்ளது... அதனால் எனக்கு தனியாகத் தேவைப்படாது’ என எண்ணுகிறார்கள். அது மிகவும் தவறு. இன்று எல்லோரும் தனியார் நிறுவனங்களில் வேலைசெய்யும் சூழல். மேலும் வெகு காலம் யாரும் ஒரு நிறுவனத்தில் வேலைசெய்வதில்லை, அப்படி இருக்கும்போது, ஒரு வேலையைவிட்டு மறு வேலையில் சேரும்போதுகூட, நமக்கு ஏதாவது நோய் வரலாம். மேலும், பாலிசி எடுத்துச் சில ஆண்டுகள் கழித்துதான் சிலவகையான நோய்களுக்கு கவரேஜ் கிடைக்கும். அதனால் தனியாக எடுத்துக்கொள்வது நல்லது. இன்று புதிய வகையான பாலிசிகள் வந்துள்ளன. அவற்றில் ஒன்று நம்முடைய வரம்பு போக, உயிர்க்கொல்லி நோய்கள் எதுவும் கண்டெடுக்கப்பட்டால், நம்முடைய பாலிசி தொகைபோல இருமடங்கு கொடுக்கிறார்கள். அது மிகவும் பயனுள்ளதாக இருக்கும். 

மருத்துவமனையில் அனுமதிக்கும்  முன்பும் பின்பும்!  

சில நோய்களைக் கண்டுபிடிப்பதற்கு முன்பு சில டெஸ்ட் எடுக்க நேரிடும், சில மாத்திரைகள் சாப்பிடவும் செய்யலாம். இவை வழக்கமான மருத்துவ ஆலோசனைகளின் அடிப்படையிலும் தேவையின் அடிப்படையிலும் முடிவுசெய்யப்படும். 30 முதல் 60 நாட்களுக்கு முன்பு வரை ஆகும் செலவுகளில் ஒரு குறிப்பிட்ட அளவுத் தொகையே இதன் வரம்புக்குள் கொண்டுவரப்படும். அதேமாதிரி நாம் மருத்துவமனையைவிட்டு வந்தவுடன் நோய் உடனடியாகக் குணமாகாது. அதன்பிறகும் ஆகும் செலவுகளையும் இதில் சேர்க்க முடியும். சிகிச்சைத் திட்டம் பாலிசி எடுப்பதற்கு முன் கண்டுபிடிக்கப்பட்ட நோய்களும் இந்தத் திட்டத்தில் அடங்கும். உயிருக்கு ஆபத்தை ஏற்படுத்தும் நோய்கள், நீண்ட காலம் மருத்துவமனையில் தங்கியிருந்து சிகிச்சை மேற்கொள்ள வேண்டிய நோய்கள், அதிக மருத்துவச் செலவை ஏற்படுத்தும் நோய்கள் ஆகியவை இந்தத் திட்டத்தின்கீழ் கொண்டுவரப்பட்டுள்ளன. 

நிதிப் பற்றாக்குறை! 

மருத்துவமனையில் சேர்க்கப்படும்போது, நாம் உடல்ரீதியாக மட்டும் பாதிப்புக்குள்ளாவது இல்லை. மாறாக நம்மால் வேலைக்குச் செல்ல முடியாது. அதனால் நம்முடைய சம்பளத்தில் துண்டு விழும். நிதிச் சுமைகளை யார் கவனிப்பது என்பதுபோன்ற கேள்விகள் மனதைப் பிசையும். நாம் எடுக்கும் பாலிசிக்கு ஏற்ப நமக்கும், நம்மைப் பார்த்துக்கொள்பவருக்கும், சில பாலிசிகளில் நாள் ஒன்றுக்கு அதிகபட்சமாக 2,000 ரூபாய் வரை தருகிறார்கள்.

மருத்துவப் பரிசோதனை செய்பவர்கள், காப்பீட்டு நிறுவனத்தால் ஏற்பாடு செய்யப்பட்ட மருத்துவமனைகளும், மருத்துவர்களும்தான். எனவே, உங்கள் தரப்பு வாதம்தான் வெற்றிபெறும்.